Ji girtiyan re gotin ‘Hûn terorîst in’ û Serlêdanên wan ên derbarê sûc de desteser kirin!

2017-10-05 12:21:25


	 

	NAVENDA NÛÇEYAN – Jinên girtîyên siyasî yên Girtîgeha Tîpa E yê ya Amedê û Girtîgeha Tîpa M yê ya Îskenderûnê diyar kirin ku ji ber zext û zordestiyên li girtîgehan divê demildest raya giştî bê avakirin. Jinên Îskenderûnê zordestiyên ku li girtîgehê tê kirin nivîsandin û diyar kirin ku mudurê girtîgehê ji wan re gotiye” Hûn terorîst in loma em ê ji a niha şûn de bi awayekî cuda nêzî we bibin.” Jinan anî ziman ku serlêdanên sûcdariyê wan jî hatine desteserkirin.  

	 

	Zext û zordestiyên ku li girtîgehên Kurdistanê û Tirkiyeyê tê kirin roj bi roj zêde dibin. Ev zext û zordestiyan bi taybet li ser girtiyên siyasî tê kirin. Girtîgeha Tîpa E yê ya Amedê û GirtÎgeha Tîpa M yê ya Îskenderûnê jî di nava van girtîgehan de cihên xwe digirin.

	 

	 ‘Hûn terorîst in em ê cuda nêzî we bibin’

	 

	Jinên girtiyên siyasî yên Girtîgeha Tîpa M yê ya Îskenderûnê di nameya şandibûn de diyar kirin ku piştî mudurê girtîgehê hatiye guhertin, helwesta girtîgehê jî guheriye. Jinên ku bi zex û zordestiyan rû bi rû dimînin daxuyandin ku şeva 2’ê Cotmehê girtinin ser odeyên wan û her tişt belav kirine. Her wiha jinên girtiyên siyasî gotin:”Dema ku em derdikevin hevdîtinê mudur ji me re dibêje ‘Hûn Terorîst in, em ê bi helwestek cuda nêzî we bibin.’”

	 

	Jinên di girtîgeha Tîpa M yê ya Îskenderûnê de zext û zordestiyên ku li wan tê kirin wiha rêz kirin:

	 

	*Hevdîtina li ser piyan li me asê dikin û nûnertiya napejirînin.

	 

	*Lêpirsînên kêfî tê vekirin.

	 

	*Di têketina girtîgehê de lêgerîna tazî tê asêkirin.

	 

	*Mafên me yê civakî nadin me.

	 

	*Alavên ku bi rêya qoliyan tê nadin me.

	 

	*Me nabin diransaz û revîrê.

	 

	*Dema ku em diçin tedawiyê me bi kelepçeyê dibin. Wekî hincet jî talîmata dozger nîşan didin.

	 

	*Ji nav xwarinan kêzik derdikeve.

	 

	*Nameyên me nayên şandin, nameyên ku tên nadin me.