Tepişteyê cinî: Binpaykerdişê heqan yê yenê vînayîş ra tewr zêde yê 

2024-11-09 11:19:26


	 

	 

	Nazlican Nûjîn Yildiz

	 

	ÎZMÎR - Tepişteyê sîyasî yê cinîyê Zîndanê Cinîyan  ê Şakranî de manenê, mektûba ke şirawitî de dîyar kerdî ke binpaykerdişê heqan yê çapemenî de yenê vînayîş, tewr zêde yê.

	 

	Tepişteyê sîyasî yê cinîyê ke Zîndanê Cinîyan ê Şakranî de manenê, mektûba ke aşma êlule de nuştî, resa ajansê ma. Cinîyan dîyar kerd ke binpaykerdişê heqan yê zîndanan zaf zêde yê û na babete de venga hîsgêrî rayaumûmî rê kerdî.

	 

	Mektûbe de wina yeno vatiş:

	 

	“Merhaba hevalno, merhaba hemrayîno…

	 

	Ma şima zerrî ra silam kenê, kenê xo verike. Hêvîya ma aya ke şima her hetî ra baş û bi moral bê. Ma bi silamdayîşêk qij bî meymanê şima. Waştişê ma başî û moralê şima yo. Ma nêeşkenê xo biresnê şima, şima kenê xo verike û silaman şirawenê. Ewro ma şî îfade. Semedo ke ma aşma temmuze de govende kerd û tilîlî ant. Cipersayîş govenda ma rê ame akerdiş. Cezaya dîsîplînî wazenê. No tecrîd merdimî dejneno. Şerê Rojhelatê Mîyanên yenê ciwîyayîş, şerê ke hetê emperyalan ra yenê kerdiş û kaosê Tirkîya hetêk ra yê ke ma rê zî yeno kerdiş hetêk ra. Ma nêzanê no tablo senî vajê. Ma nêzana ke nê trajedî senî qal bikerê. Rayîrşîyayîşê şima, têkoşînê şima hêz dano. 

	 

	‘Xoresnayîşê şima asanêr o’

	 

	Ma dorê rîpelê şima rê vilî xêz kerdî. Qelemê ma qedênê û ma şima rê kaxidê bêreng şirawenê. Semedo ke zîndanan de rengî qedexe yê. Boyax qedexe yê. Xêzkerdiş qedexe yo. La rengî çinîbê zî ma bi enerjîyê xo yê rengîn, şima silam kenê. Ma zanê ke govende û tiliiyê ma asmênî lerzneno. Ma merhemê birînanê yewbînan ê. Ma tîya nêweş bikewê, hîrê aşman ra reyke eşkenê vejîyê revîr. Ma nêweş bikewê zî rayîrê revîrî ma rê padaye yo. Xoresnayîşê şima, xoresnayîşê koxuşanê verê ma ra asanêr o. Ma bi şans, tesaduf hevalanê xo yê tîya vînenê. 

	 

	Ma xeylêk binpaykerdişê heqan dir rî bi rî yê. Ma nêeşkenê tîya rêze bikerê. Semedo ke zaf zêde yê.  Yê ke çapemenî de yenê vînayîş, zaf kêmî yê. Na noqta de ma bawer kenê ke şima xo biresnê ma, eleqedar bibê û bale ancenê binpaykerdişê heqan ser. Hêvîya xelasîya şaran, bi rijnayîşê zîhnîyetê serdest yê camêrdî, xelasîya cinî, ciwîyayîşkerdişê Narîne, Ceylane û Berkînan ra derbaz beno. Ma do ewro nê têkoşînê xo zergûn bikerê. Ma sey hevalan kenê xo verike, maçî kenê. Bi hişmendîyê ke hêvî serkewtişî ra hîn muhîmêr a, ver bi azadîye şinê û  şima emanetê germbîyayîşê rojî kenê.

	 

	Bi silam û rêzdarîyê şorişgêrî.”

	 

	*Tepişteyê sîyasî yê cinî yê zîndanê Cinîyan ê Şakranê Îzmîrî de manenê, semedo ke govende kerdî û tilîlî antî, derheqê înan de cezaya dîsîplînî amebî dayîş. Roniştişê îtîrazkerdişê ceza 18ê êlule de yewin dadgeha înfazê Karşiyakayî de amebî vînayîş. Dadgehê na ceza wedarnabî.