TAJÊ konferansê Aştî û Cimatê Demokratîk silam kerd 

2025-12-08 14:25:52


	 

	MERKEZÊ XEBERAN – TAJÊ derheqê muhîmîya Konferansê Aştî û Komelê Demokratîkî yê Mîyanneteweyî ke Stenbolde ame viraştiş de beyanatêko nusnaye da.

	 

	Têgêrayîşê Azadîya Cinîyan ê Êzdîyan (TAJÊ) bi beyanatêko nusnaye ke pare kerd de dîyar kerd ke ê Konferansê Aştî û Komelê Demokratîkî yê Mîyanneteweyî ke Stenbol de ame viraştiş silam kenê û konferansî zî zaf bi qîmet vînenê.

	 

	Dewamê beyanatê nusnaye yê TAJÊ’yî wina yo:

	 

	“Bi nameyê têgêrayîşê azadîya cinîyan ê êzdîyan û komelê êzdîyan ê Şingalî ma heme delege û tewrîbîyayeyê erjaye yê konferansê aştî û komelê demokratîkî yê mîyanneteweyî silam kenê û konferansî pîroz kenê.

	 

	Ma cinî û komelê êzdîyan nê konferansî zaf bi qîmet vînenê. Şaro ke nê erdî ser ciwîyenê xeylê qirkerdiş û qiekerdişan ra derbas bîyî. Ma komelê êzdî erdê Mezopotamya ser o 74 fermanî ciwîyayî. Tewr peynî seserre 21ine de ke dinya şahidê ci bîyê, fermanê 3yê tebaxe 2014ine. Wextêko winasî ke aştî rojeva ma de ya, hema bi hezaran merdimê êzidî vînî yê. Semedê nê ma vanê aştî qîmetdar a û şaran heq kerd ke bi aştî biciwîyê.

	 

	Ma piştîdayîşê xo semedê Prosesê Aştî û Komelê Demokratîkî eşkera kenê û bawer kenê ke no demêk tarîxî yo û serkewtişê ci semedê merdimîye do bibo bîyayîşêko newe yê azadîye. Bingehê aştîyêka rasteqîne cuyêka sosyalîst a. Ma na bawerîye de yê ke bi yewîya şar û cinîyan, cuya komînal ê demokratîke ancî newe ra bêro awankerdiş. Serkewtişê prosesî do bibo peynîya fermanan.

	 

	Hema zî serkewtişê prosesî, bi caardişê heqê hêvîye semedê Rayber Apo, bi azadîya fizîkî ya Rayber Apo mumkîn a.

	 

	Biciwîyo aştî û komelê demokratîk!”