10 serrî yo cenazeya lajê xo gêrena: Yewine waştişê mi aştîye ya 2026-01-17 10:22:36   ŞIRNEX - Ayşete Atabay ya ke prosesê qedexeyê vejîyayîşê teberî yê Kurdistanî de lajê xo vînî kerd û 10 serrî yo cenazeya tutê xo gêrena wina va: “Ez wazena cenazeya tutê xo bivîna. Waştişê min ê bînî çin o. Hewn de zî tutê xo vînena û şîyar bena. Ma zaf dej ant. Semedê nê ma aştî wazenê.”   Zafê bajaranê Kurdistanî de serra 2015ine de qedexeyê vejîyayîşê teberî ameyî îlankerdiş. Sûr, Gever, Nisêbîn û Cizîr. Şarê kurdî prosesê qedexeyî de zafê zext û caardişan dir rî bi rî mend. Şarê kurdî ke bi serran o têkoşînê girdî dano qedexeyan de dejê girdî ciwîyayî. Bi vengdayîşê Rayberê Şarê Kurdî Abdullah Ocalanî yê 27ê Sibate dir, şar pêwa heme dejî ciwîyayê semedê aştîye têkoşîn keno.   Nesîm Atabay qedexeyê vejîyayîşê teberî yê Cizîrî ke wendekarê zanîngehe bi dest zanîngehe ra vera da û semedê piştîdayîşê xoverdayîşê Nisêbînî şi uca. Dayîka Nesîm Atabay, Ayşete Atabay da zanayîş ke bi serran o cenazeya lajê xo gêreno û va yewine waştişê aye vînayîşê cenazeya lajê aye yo û caardişê aştîye yo.   Ayşete Atabay dej, xoverdayîş û waştişê aştîye ajansê ma rê ercnayîş kerd.   ‘Demo ke ma keyeyan ra vejîyayî ma tu çîyê xo nêgirewt’   Ayşete Atabay wina ard ziwan: “Demo ke qedexeyê Cizîrî bi ma zî Cizîr de bî. 25 rojî ma asê mendî. Awe zî çin bî. Ma nêzanabî ke qedexe do hende dewam bikerê. Xidayê ma zaf çinbî. Ma bi rojan vêşan mendî. Ma nêeşka nimaj bikerê. Pêwa her çî ma semedê xo nê semedê tutanê xo tersayîne. Semedo ke tutê ma kuçeyan de bî. Roja 21ê qedexeyî de vatî do çeteyê DAIŞî bêrê hêriş bikerê. Ma nêzanayêne ma se bikerê. Semedo ke ma zere ra vejîyê ma alêka spî girewt û vejîyayî teber labelê gule rijnayî. Roja bîn leşkerî ameyî û waştî ma tîya ra vejê. Demo ke ma keyeyê xo ra vejîyayî ma tu çîyêk xo nêgirewt.”   ‘Ma tutê xo gêrayî’   Ayşete Atabay kesê bodruman de ameyî qetilkerdişî ard vîr û wina va: “Şarê sivîlî bodruman de asê mendî. Mehmet Tunç her roje hetkarî waştêne. Labelê hemine uca de veşnayî. Ma her tewir şîdet û feqîrî, vêşanî dî. O dem tutêk mi tewrê PKK’yî bibi. Lajê min o bîn Anqara de zanîngeh wendêne. O wext vînî bi. Ma agêrayî keye ma tutê xo gêrayî. Dima ra lajê mi xo resna ma û va semedê piştîdayîşî şîyo Nisêbîn.”   ‘Ez êdî nêwazena cenazeyan bivîna’   Ayşete Atabay dewam de wina va: “Her roje Anqara û Nisêbîn ra telefonî ameyîne. Ma cenazeya tutê xo gêrayîne. Ma semedê cenaze şîyî zaf bajaran. Polîsî her roje eştêne keyeyê ma ser. Fotografê tutanê ma parçe kerdêne, heqaret kerdêne. Zirar dayîne hacetan. Ez 10 serrî yo cenazeya lajê xo gêrena. Her tim yeno hewnê mi. Ma her dejî ant. Ma cenazeyê veşnaye dî. Ma cenazeyê ke bedenê înan tam nîyê ma dî. Tîya verê çimanê ma de 6 ciwanî qetil kerdî. Ez dest têkoşînê xo ra veranêdana. Ez êdî nêwazena cenazeyan bivîna. Kezeba mi veşa wa yê kesê bînî nêveşo. Ma tu çîyêk ra nêtersenê.”   ‘Wa aştî bêro caardiş’   Ayşete Atabay wina peynî ard: “Pêwa her çî ma aştî wazenê. Wa ciwanî êdî nêmirê. Ma aştî û têduştî wazenê. Wa tu dayîkî mebermê. Ma semedê aştîye lingan ser o yê. Waştişê mi dîyayîşê cenazeya lajê min o û caardişê aştîye yo.”