Şîlan Kobanê: Şêxmeqsûd û Eşrefîye de gazê kîmyewî şuxulnayî 2026-01-17 11:14:39   Derya Ren   RIHA - Fermandara Hêzê Asayîşê Zereyî ya Şêxmeqsûd û Eşrefîye Şîlan Kobanê dîyar kerd ke Şêxmeqsûd û Eşrefîye de çekê giranî ameyî şuxulnayene û va: “Hêrişan de çekê kîmyewî ameyî şuxulnayene.”   Hêrişê çeteyê HTŞ’yî hemverê taxanê Şêxmeqsûd û Eşrefîye yê Helebî 6ê çeleyî ra dewam kenê. Hêrişan de bi desine kesî ameyî qetilkerdiş û bi seyine kesî birîndar bîy. Deniz Çiya, Hawar Qendîl, Rojbîn Amara, Dilbirîn Qamişlo û Feraşîn Efrîn, endamê Hêzê Asayîşê Zereyî yê Şêxmeqsûd û Eşrefîye, semedê nêkewê destê çeteyan û pawitişê taxanê xo, çalakîya fedaî pê ardî. Nê qonaxî de, Fermandarê Pêroyî yê QSDî Mazlum Ebdî bi mîyançîya hêzê mîyanneteweyî adirbest herême rê neql kerd û neqlkerdişê sivîlê birîndaran her di taxan de dest pêkerd. Heto bîn ra, ame neqlkerdiş ke çeteyî bi seyine kesî mîyan de cinî û tutî zî estbî her di taxan ra remnayê.   Fermandara Hêzê Asayîşê Zereyî ya Şêxmeqsûd û Eşrefîye Şîlan Kobanê derheqê rewşe de ercnayîş kerd.   ‘Şar xo ver da’   Şîlan Kobanê dîyar kerd ke her di taxî 14 serrî bi hêzê xopawitişê xo pawitî û va: “Şarê ma hende serrî hemverê heme hêrişan xo ver da. Ameyîşê HTŞ’yî dir, di rey hêrişê ma kerdî. Hêrişê peyên de, ma bi hêzê xo hêriş peyser eşt. Labelê înan heme çekê xo yê teknîkî û giran şuxulnayî. Pêwa ambargoyê ke bi aşman ame ferzkerdiş zî, şarê ma xoverdayîşê pîlî mojna.”   ‘Çekê kîmyewî şuxulnayê’   Şîlan Kobanê, hêrişê peyên de qetî kerd ke HTŞ tena nêbî û va: “Heta çekê ke hêrişan de ameyê şuxulnayene yê artêşa Sûrîye nêbî. Ê çekê Tirkîya bî. HTŞ tena nê hêrişî nêkerd. Mîyanê înan de xerîbî zî bî. Înan ziwanê cîya zî şuxulnayêne. Tewr peyên, înan her di taxan de çekê kîmyewî şuxulnayî. Înan hewl da ke îradeyê şarê ma bişkinê, labelê şarê ma her şert û mercî de xo ver da.”   ‘Ma merdiş tercîh kenê û teslîm nêbenê’   Şîlan Kobanê dîyar kerd ke her di taxî vernê de hetê HTŞ’yî ra ameyî bombebarankerdiş û dima ra bi çekê giranan hêriş ameyo kerdiş û va: “Pêro dinya hêrişî dî, labelê bêvengî bî. Ma qirkerdişêk girdî dir rî bi rî mendî. Ma tu carî îradeyê xo teslîm nêkenê. Ma her tim şarê xo dir ê. Înan waşt ke ma teslîm bibê, labelê ma nê qebûl nêkerd. Xêrcê çekanê tewr giranan, hemverê her di taxan de çekê kîmyewî zî ameyî şuxulnayene. Çekûyî nêeşkenê hîsê ma qal bikerê. Hevalê ma çalakîyê fedaîyane kerdî. Cenazeyê ma ameyî îşkencekerdiş. Şer zî exlaqê xo est o. Labelê ma dî ke tîya exlaqê şerî çin o. Sey şarê kurdî, ma xo ver da, teslîmb nêbî. Wa şarê ma bizano ke ma her tim xo ver danê û înan pawenê. Ma merdiş tercîh kenê, labelê ma teslîm nêbenê.”