Wanijan ekonomî erjnayî: Welatêk demokratîk şert o 

2026-04-30 10:57:43


	 

	Rozerîn Gultekin-Oznur Deger

	 

	WAN - Cinîyan derheqê polîtîkayê ekonomî de ercnayîş kerdî û dîyar kerdî ke ê nêeşkenê debara xo bikerê û vatî ganî cinî wayîrê ekonomîyêk azad bê. Sewbîna cinîyan dîyar kerdî ke semedê çareserkerdişê problemê ekonomî ganî welat demokratîk bo.

	 

	Betalî her şina giran bena, kewtişê hêzê girewtişî û enflasyonê berzî yê ekonomîya welat hîna zêde ver bi xirabîye beno û merdimî mahkûmê cuyêka binê sînorê vêşanîye kenê. Aşma nîsane 2026ine ra tepîya sînorê vêşanîye resa 36 hezarî. Sînorê feqîrî zî vejîya 108 hezarî ser. Keyeyî nêeşkenê tutanê xo re çîyêk bigîrê, merdimî nêeşkenê kira û fatûreyan bidê, ciwanî kar nêvînenê û bi pêroyî heme şar hemverê polîtîkayanê ekonomîye bêzar bîyo.

	 

	Ma feqîrîya ke her şina giran bena û ekonomîya şarê Wanî persa.

	 

	Ganî welat demokratîk bibo

	 

	Cinî û ciwanî dîyar kerdî ke ekonomî baş nîya û bale antî betalîya ke her şina giran bena ser o. Cinîyan da zanayîş ke sebebê xirabîyê ekonomî îdarekerdişê welatî yo û vatî ganî no welat demokratîk bibo.

	 

	Çareserî cimato wayîrê hişmendî yo

	 

	Cinîyan destnîşan kerdî ke merdimî nêeşkenê mutbexê xo pirr bikerê, nêeşkenê xidayê baş bidê tutanê xo, nêeşkenê kira bidê û mumkîn nîyo ke bi meaşê asgarî û bi meaşê teqawîtbîyayîşî debare bêro kerdiş. Cinîyan dîyar kerdî ke ekonomîya ke her şina xerab bena tewr zêde tesîr cinîyan ser o kena. Sewbîna cinîyan dîyar kerdî ke ganî cinî wayîrê ekonomîyêka azad bê û vatî çareserî zî cimatêk wayîrê hişmendî yo.