Îdîayê Tuncay Sonelî veng vejîya

2026-05-04 14:16:56


	 

	Şehrîban Aslan

	 

	AMED - Cipersayîşê Gulîstan Doku de her çend walîyê Dêrsimî yo verên Tuncay Sonelî îdia kerdbî ke ey seba cayê Gulîstan Doku bizano qertê sîmî yê telefonî aye rê erşawito. Ame zanayene ke cayê Gulîstan Doku 7ê çele 2020, de ameyo tespîtkerdene û kewto dosya. Bi nê delîlê şênberî îdiaya walîyê verên Tuncay Sonelî puç bîye.

	 

	Wendekara sinifa dîyine ya Unîversîteya Munzurî ya Dêrsimî Gulîstan Doku 1ê çele 2020î de vîndî bîye. Tewrê avûkat û keye, xeylê rêxistinanê cinîyan her cayê Tirkîya û vakurê Kurdîstanî de aqûbetê Gulîstan Doku persayê. Badê 6 serran 13ê nîsane de seba perskerdişê aqûbetê Gulîstan Doku operasyonê destbendkerdişî ameyê dest pêkerdene. Derheqê babete de heta nika 15 kesî ameyê destbendkerdene, înan ra 12 kesî ameyê girewtene û ê erşawitê hepisxane.

	 

	Vejîya meydan ke Walîyê Dêrsimî yê ê wextî Tuncay Sonelî derheqê serebûte de delîlê ke ameyê komkerdene vîndî kerdê. Tuncay Sonelî her çend naye qebul nêkero zî her roje belgeyê ke vejîyenê orte îdiayanê Tuncay Sonelî puç kenê.

	 

	

	Îdiayê Tuncay Sonelî ameyo redkerdiş

	 

	Tuncay Sonelî Xarpêt de ame destbendkerdene û ey berd Erzirom. Wexto ke ameyo destbendkerdene nasnameyêkê sexte Tuncay Sonelî ser o bîyo. Ame zanayene ke îfadeyê de ke dabî serdozgerê Erziromî xeylê nakokî bîbî û zafê îdiayî zî qebul nêkerdbî. 

	 

	Vejîya meydan ke Tuncay Sonel qertê sîmî yê telefonê Gulîstan Doku dayo polîsê verên Gokhan Ertok ke çeteyanê sîberî reyde xebitîyeno. Ney ra ver zî ma agahîyê derheqê serebûtî de pare kerdbî û îdiayê Tuncel Sonelî puç kerdbî. Delîlê ke vejîyayê meydan zî na xebere teyît kenê.