DBP: Terteleyê Dêrsimî zerrîya şarê kurdî de birînêk kûr o

2026-05-04 14:34:20


	 

	AMED- Seba serrgêra qerarê fermî yê Terteleyê Dêrsimî ke 4ê gulane 1937 de amebî girewtene sey destpêkê qirkerdena Dêrsimî yeno qebûlkerdene û bi munasebete na roje Partîya Herêmanê Demokratîkan (DBP) eşkerayî da û kesê ke Terteleyê Dêrsimî de ameyê qetilkerdene bi hurmet û bi minet yad kerdî.

	 

	Heyetê Partîya Herêmanê Demokratîkan (DBP) Terteleyê Dêrsimo ke 4ê gulana 1937î de bi şeklêko fermî dest pêkerd, 89 serrîyo wijdanê şarê kirmancî de dirbetîyêka xorîne kerde ya, yad kerd û dîyar kerd ke Terteleyê Dêrsimî zerrîya şarê kurdî de birînêk kûr o.

	 

	‘Armanc çinkerdişê îradeyê şarê kurdî bi’

	 

	DBP’yî dîyar kerd ke qirkerdişê Dêrsimî yo ke hetê îdareyê nîjadperestî ra ame serûberkerdene, têna herêma dewrêsî nê, heme Kurdîstan hedef girewto û wina va: “Çike îradeyê xoverdayîşî, ruhê azadî û reftarêko qerardaro ke Dêrsim de est bî; hêz dayêne dewaya heme şarê kurdî. Pêro dinya hayîdar bîye ke kamîya Dêrsimî ya rengine de zulmkarî rê îtaet, qirkerdoxî rê çokdayîş û îşxalkerî rê xizmetkarîye çin bîye. Mîmarê komara yewperestê ke sere de Dêrsim pêro erdê kurdan de awankerdişê pergalê cîyaker û tedakerî armanc kerd; her tewr metodo leşkerî şuxilna, vera ziwanê kurdî polîtîkaya asîmîlasyonî arde ca, xoza xeripnaye û vera cinîyanê kurdan nêzdîbîyayîşêko cinsîyetperest qebul kerd.”

	 

	‘Tu hêz nêeşka nê îradeyî bişikino’

	 

	DBP’yî bale ant polîtîkaya dewlete ya hemverê kurdan û va: “Labelê çi metod û hêz nêeşka îradeyê azadî yê şarê kurdî yê pêtî bişikno. Çike no îrade Alîşêr û Ana Zarîfa, Seyîd Riza û Besêyan ra mêras mendbî. Xoverdayîşo tarîxî yo ke Dêrsim de vera pergalê qirkerî qewimîya, ewro vera hêzê serdestî bi şîarê “sosyalîzm de israr, merdimîye de israr o” ramîno. Çîyo ke îqtîdarê înkarker û îmhakerî birijno, tekane sîstemê komunî yo. Bi no hawa, ma reyna anê ziwan; şaro kurd do qetî ray û rayberîya Birêz Ocalanî reyde bireso cuya têduşt û azade.”

	 

	‘Ma do têkoşînê înan bidominê’

	 

	DBP’yî peynîya eşkerayîye de girêdayîşê bi tekoşînê cuyêka têduşt û azad reyna kerd û va: “Ma sey Partîya Herêmanê Demokratîkan verê vîrameyîşê gananê ke Dêrsim de ameyî qirkerdene, vileyê xo çewt kenê. Wa bêro zanayene ke ma do têkoşînê înan bi qerardarî bidomnê.”