
Rewşa weşîye ya Nêrgiz Mihemedî giran a! 

2026-05-04 15:08:41


	&nbsp;

	MERKEZÊ XEBERAN - Ame eşkerakerdene ke rewşa weşîye ya wayîrê Xelata Aştî ya Nobelî Nêrgiz Mihemedî giran bîya.

	&nbsp;

	Ame zanayene ke Nêrgiz Mihemedî ya ke Îran de girewte ya, beşê qelbî de binê tedawî de ya û rewşa aye krîtîk a. Weqfo ke hetê keyeyê ci ra yeno îdarekerdiş, eşkera kerd ke Nêrgiz Mihemedî vakurê rojavyaê Îranî de yew nêweşxane de beşê çimdarîya awarte yê qelbî de tedawî vînena. Eşkerayîya Weqfî de nê çîyî ameyê vatene: “Tansîyonê Nêrgiz Mihemedî bi şeklêko tehlîke bedilîyeno û heta nika bi destekê oksîjenî tedawîya ci yena kerdene ke rewşa aye stabil bimana.”

	&nbsp;

	Ame dîyarkerdene ke Nêrgiz Mihemedî dima ke rewşa weşîya aye “asta felaketî” de xirab bîye, roja îne hepisxane ra seba nêweşxaneyê Zencanî ameya sewqerdene.Eşkerayî de ame parekerdene ke Mihemedî di reyî hişê xo vindî kerd û krîzê qelbî yo giran vîyarna.

	&nbsp;

	Nêrgiz Mihemedîya ke seba heqanê cinîyan û hewanayîşê cezaya dardekerdişî kampanya viraşte û ameybî girewtene, wexto ke hepisxane de bîye Xelata Aştî ya Nobelî girewtbî. Keyeyê ci peynîya aşma adarî de zî eşekra kerdbi ke aye krîzê qelbî vîyarnayo. Weqfî dîyar kerd ke seba tedawîyêka bitesîr, ganî Nêrgiz Mihemedî sewqê merkezêkê Tehranî bêra ke doktorê ci yê taybetî uca de yê.&nbsp;

	&nbsp;

	Aşma sibate de ame eşkerakerdene ke derheqê Nêrgiz Mihemedî de 7 serrî û nîm cezaya hepsî ya newe ameya dayene. Komîteya Nobelî zî veng dabi îdareyê Tehranî ke wa Nêrgiz Mihemedî cade bêra veradayene.

	&nbsp;

	Nêrgiz Mihemedî, aşma kanûne de dima ke mergê avukat Husrev Alîkurdî rexne kerd, ameybî girewtene. Serdozger Hasan Hematîfarî îdia kerd ke Nêrgiz Mihemedî merasîmê vîrardişî de “Vatişê provokatîfî” vatê.

	&nbsp;

	&nbsp;