Rojê Kitaban ê Erxenî de pawitişê ziwanê dayîke vejîya vernê 

2026-05-13 09:58:02


	 

	Pelşîn Çetînkaya

	 

	AMED - Hemşaredara Erxenî Bîrsen Azak Bayar eşkera kerd ke armancê fuarê kitaban no yo ke ciwan û tutan polîtîkayanê şerê taybetî ra dûrî bifînê û va: “Her wareyo ke ciwan û tutî tede kitaban reyde yenê têhet, biqîmet o.”

	 

	2yin Rojê Kitaban ê Erxenî ke bi serkêşîya Şaredarîya Erxenî û Egîtîm Senî ame kerdene, bi tewrbîyayîşêko pîl peynî bi. Fuaro ke 4 rojî dewam kerd de, qiseykerdişî, rojê îmzeyan, atolyeyê tutan, pêvînayîşê wendiş û nuştişî ameyî kerdene. Bitaybetî weşanxaneyê kurdkî hetê tutan ra rastê eleqeyêko pîl ameyî.

	 

	Hemşaredara Erxenî Bîrsen Azak Bayar derheqê fuarî de qisey kerd.

	 

	‘Ma vera ablûqakerdişê polîtîkayanê şerî wareyan akenê’

	 

	

	Bîrsen Azak Bayar dîyar kerd ke yew rayîrê xelaskerdişê tutan û ciwananê binê lepê polîtîkayanê şerî ra têhet ameyîşê bi kitaban o û wina dewam kerd: “Ma çend rojî verê cû fuar akerd. Şarî eleqeyêko pîl mojna. Ma zaf keyfweş bîyî. Ma no eleqe pawitêne. Ma serrgêra vîyarte ya yewine kerdîbî. Ma bawer kerd ke ma do dewamîya ci bîyarê. Nê semedî ra ma yê diyine kerd. Hetanî ma estbê ma do yê hîrêne, çarine û bînan zî bikerê. Seba polîtîkayanê şerî, cinî û ciwanî yenê ablûqakerdiş. Ma vera şîdet, tîryak û fuhuşî hewl danê wareyan awan bikerê. Nê semedî ra no fuar seba ma mûhîm û biqîmet o.”

	 

	‘Cimatê ke tarîxê xo nêwano, ameyoxê înan çin o’

	 

	Bîrsen Azak Bayar dîyar kerd ke Rojê Kitaban bi paştîdayîşê komunal ameyo rêxistinkerdiş û wina va: “Bi serkêşîya Şaredarîya Erxenî û Egîtîm Senî, bi hemkarîya rêxistinanê cimatê sivîlî ma pê kerd. No bernameyo ke bi paştîdayîşî ameyo rêxistinkerdiş ma zaf keyfweş kerd. Ma yew bi yew standan gêrenê. Ma weşanxane û hemwelatijan reyde qisey kenê. Eleqeyo ke yeno mojnayîş û rotişê kitaban ma keyfweş keno. Cimatê ke tarîxê xo nêwano, nêşkeno ameyoxê xo awan bikero.”

	 

	Bîrsen Azak Bayar da şinasnayene ke înan fuar de bi hîrayî ca dayo weşanxaneyanê kurdkî û wina ard ziwan: “Ma serê ziwanê dayîke vindertî. Ma vînenê ke tut û ciwanî ziwanî ra dûrî kewenê. Nê semedî ra zî ma zaf standê kurdkî akerdî. Seba tutan kitabê kurdkî ca girewt. Tutê ke bi ziwanê dayîke bîwanê, hişmendîya înan aver şona. Eleqeyo ke ame mojnayene hêvîya ma pîl keno.”