Riha de cinîyêke ameye kiştiş

2026-06-23 14:22:35


	 

	MERKEZÊ XEBERAN - Emîne Kûrt a ke Riha de mendêne, hetê Mehmet Kûrtî ra ameye qetilkerdiş ke ey dir zewicîya bî. Goreyê agahîyan, kerdoxî dimayê qetilkerdişî hewl da bimojno ke hedîse xokiştiş o.

	 

	Merdimê Emîne Kûrte ya Rihayî de dimayê ke nêeşkayî agahî aye ra bigîrê, şîyî keyeyê ke cina uca de mendêne. La dîyî ke Emîne Kûrt erd de derg bîya û agahî dayî Merkezê Vengdayîşê Lezkî yê 112yî.

	 

	Tîmanê weşîye û polîsî ke ameyî cayê hedîse, netîceya cipersayîşî de tespît kerdî ke Emîne Kûrt dinyaya xo bedelnaya.

	 

	Cipersayîşê girêdayeyê hedîseyî de Mehmet Kûrt ame destbendkerdiş.

	 

	Kerdox Mehmet Kûrt îfadeyê xo yê Emnîyetî de îtiraf kerd ke ey Emîne Kûrt kişta û semedo ke qetilkerdiş binimno hewl dayo ke bimojno Emîne Kûrte xo kişta.

	 

	Mehmet Kûrt dima ra teslîmê edaletî ame kerdiş û hetê dadgehe ra ame tepiştiş.

	 

	Cenazeya Emîne Kûrte dimayê otopsîya Sazgehê Tipê Edlî keyeyê aye rê ameye teslîmkerdiş. Dima ra zî cenaze bi merasimêk ameye definkerdîş.

	 

	Her aşmî bi desine cinî yenê qetilkerdiş. Goreyê bîlançoyê aşma gulane ya JINNEWSî, 16 cinî ameyî qetilkerdiş, 25 cinî bi guman dinyaya xo bedelnayî.

	 

	Platformê Ma Do Qetilkerdişê Cinîyan Vindarnê zî dîyar kerd ke serra 2025ine de tewr tay 294 cinî ameyî qetilkerdiş, 297 cinî zî bi guman merdî.