Seba muracatê Xelatanê Gurbetellî Ersoze vengdayîş ame kerdiş 2026-07-21 10:37:05    STENBOL - Xebatkara rojnamegere Yenî Yaşamî Nazli Buket Yazici, 2yîne Xelatanê Rojnamegerîya Cinîyanê Gurbetellî Ersoze ercna û venga tewrbîyayîşî kerd û va: “Ma venga heme hevalê xo yê cinîyan danê ke semedê pîlkerdişê mîrasê ke Gurbetellî ma rê verda û semedê pîlkerdişê yewbîyayîşê rojnamegeranê cinîyan muracat muhîm o.”   Muracatê semedê Xelatanê Rojnamegerîya Cinîyanê Gurbetellî Ersoze ke emser reya dîyine hetê Komeleya Rojnamegeranê Cinîyanê Mezopotamya (MKG) ra yeno organîzekerdiş, dewam kenê. Muracat do 25ê êlule 2026ine de peynî bibê. Xelatanê Rojnamegerîya Cinîyanê Gurbetellî Ersoze do semedê yadkerdişê Gurbetellî Ersoze ya ke tarîxê Çapemenîya Azade de rayîrêk newe akerd û reya verêne Tirkîya de sey Mudira Pêroyî ya Weşanî xebate kerd, bêro organîzekerdiş.   Xebatkara rojnameyê Yenî Yaşamî Nazli Buket Yazici derheqê mesela de ajansê ma JINNEWSî rê qisey kerd.    Qonaxê muhîmî de rojnamegerîya cinîyan    Nazli Buket Yazici bale ant mîrasê Gurbetellî Ersoze û va: “Çapemenîya Azade heme îşkence, vilakerdişê dewan, veşnayîşê dewan û koçberkerdişê bi darê zorî yê ke Kurdistanî de pê ameyî deşîfre kerd. Pêwa nê zordarîyan, hevalê ma yê rojnamegerî kerdêne. Mîrasêk muhîm ma rê verdayî. Gurbetellî Ersoze semedê ma zaf muhîm a. Hem hetê rojnamegerîya cinîyan ra û hem zî hetê adetê Çapemenîya Azade ra. Çimkî adetê Çapemenîya Azade têkoşînêk semedê cigêrayîşê rastîye bî û Gurbetellî no têkoşîn pîl kerd. Ewro vernîya JINNEWSî akerd. Nê semedî ra, Gurbetellî rojnamegerîya cinîyan de qonaxêk muhîm a. Eynî wextî de, aye ancî hêvî da ma, bi taybetî semedê cinîyanê kurdan, la eynî wextî de semedê heme rojnamegeranê cinîyanê Tirkîya. Çimkî Gurbetellî verêne Mudira Pêroyî ya Weşanê Tirkîya bî.   Semedê pîlkerdişê yewbîyayîşê rojnamegerîye   Nazli Buket Yazici dewam de va: “Serrê 90ine ra nata adetê çapemenîya azade hemverê heme polîtîkayê zext, înkar û kolonyalî cigêrayîşê xo yê rastîye domnenê. Semedê ma muhîm o ke ma rayîrê hevalê ma yê ke mîras ma rê verdayî bidomnê, çîyê ke înan musnabî nîşan bidê û bikewê pratîk. Gurbetellî semedê rojnamegerîya cinîya kurde û semedê heme rojnamegeranê cinîyanê tirkî cayêk muhîmî de ca gêna. Şexsîyetêk zaf muhîm a. Par 7ê teşrîna peyêne de Xelatanê Rojnamegerîya Cinîyanê Gurbetellî ame dayîş. Armancê nê merasîmê xelatdayîşî no bî ke xeberê rojnamegeranê cinîyan hîna zêde biasê û yewbîyayîşê cinîyanê rojnamegeran hîna zêde bibo. Muracatê rojnamegerîye do 25ê êlule de peynî bibê. Nê ser o ma venga heme hevalê xo yê cinîyan danê ke semedê pîlkerdişê mîrasê ke Gurbetellî ma rê verda û semedê pîlkerdişê yewbîyayîşê rojnamegeranê cinîyan muracat bikerê 2yîne Xelatanê Rojnamegerîya Cinîyanê Gurbetellî Ersozî.”