Avûkate Burcu Şeber: Derheqê binpaykerdişê sînorî de delîlî yenê sîyakerdiş

  • 14:01 18 Êlule 2022
  • NAROJANE
 
 
Zelal Tunç
 
WAN - Hemsereka Merkezê Heqê Merdiman ê Baroyê Wanî avûkat Burcu Şebere da zanayîş ke sînorê Wan-Îranî bi îdiayê ‘binpaykerdişê sînorî’ esto, hem hemverê şarê herême, hem hemverê multecîyan polîtîkayê bêcezaverdayîşî yê binpaykerdişê heqan dewre de yê û vat: "Merdişê sînor de bêcezaverdayîş dewre de yê. Delîlê ke derheqê serebûtan de yenê nimitiş. Zabitname nêrê dayîş, nêrê girewtiş, do binpaykerdişî zêde bibê."
 
Sînorê Wan-Îranî de her serre bi hezaran kesî yenê qetilkerdiş û bi hezaran birîndar benê. Dewê girêdayê sînorî bazirganîyê ke şar keno, kenê bahane û her serre nuqteyê ke bi hezaran multecî derbaz benê de binpaykerdişî yenê ciwîyayîş û hemverê nê binpaykerdişan de zî polîtîkayê bêcezaverdayîşî dewre de yê.
 
Hemsereka Merkezê Heqê Merdiman ê Baroyê Wanî Burcu Şebere derheqê babete de qisey kerd û vat, dewaya  welatijê ke sînor de ameyê qetilkerdiş, bi zerrîwaşte girewtê serê xo.
 
Burcuya ke binpaykerdişê heqan ê sînor de cayê ci de cigêrayîş kerd û vat: “Kesî seba qeçaxtî kenê, mazot, cixare anê yenê kiştiş."
 
‘Seba kar çin o qaçaxtî kenê'
 
Burcuye wina qal kerd: “Dewa Çilya Cêrîn ya girêdayê Ebexî ya Wanî de 6ê teşrîna verêne 2020î de Şefîk Bagî bazirganîyê sînorî kerdêne, netîceyê gulevaranê leşkeran de dinyaya xo bedelna. 16ê Temmuza 2020î de reyna lajê ci  A. Bago 15 serre bi giranî birîndar bi. Ez avûkataya dosya kena. Şefîk Bag Ebex de hetê  leşkerên ra demo ke Îran ra ameyîne sînorê Tirkîya ame înfazkerdiş. Îstîhdamê merdiman tîya de çin o. Seba kar çin o, qaçaxtî kenê. Demo merdim sûcê qaçaxtî ewnîyeno, serrêke ra heta 5 serran ceza esta. Cezaya ke tepiştişê înan çin o, la beno sebebê cuya merdiman.”
 
'Îbrahîm Baykara ame înfazkerdiş'
 
Burcuye vat, eynî dewe de Îbrahîm Baykara yo 46 serre 3yê Tebaxa 2020î de sînor de dinyaya xo bedelnaye û wina vat: “Goreyê îfadeyê deza û birayê  îbrahîm Baykara, vanê leşkeran dîyo û vato, ‘keremê xo ra guleyan mevarnê’. La leşkerî guleyan varnenê. Netîceyê gulevarnayîşî de Îbrahîm Baykara birîndar beno. Zulkuf Baykara zî seba ey bigîro, estor ra peya beno û reyna gule yeno rijnayîş. La reyna şino ke bigîro. Reyna vengê sîlehan yeno û Îbrahîm Baykara sereyê xo ra yeno birîndarkerdiş û înfaz kenê.”
 
‘Seba qaçaxî kenê kiştişê înan nêno qebûlkerdiş’
 
Burcuye vat, derheqê înfazê Îbrahîm Baykara yê dadgehe ‘tevzî tahkîkat’ waştê la bi bahaneyê maktul ameyo redkerdiş û vat: “Polîtîkayêke bêcezaverdayîşî esta. Cezaya bêra dayîş zî do gumanbaran xelat bikerê. Seba qaçaxtî, kiştişê merdiman nêno bêro qebûlkerdiş. Ganî cezayêke bêro dayîş ke vernîya binpaykerdişan bêro girewtiş.”
 
‘Kes veng nêvejeno’
 
Burcuye dewam de wina vat: “Dewlete çi beno, wa bibo ganî welatijanê xo bipawo. La rewşûka eksê ci yena meydan. Talîmatê ‘sînor derbaz nêkerê’ danê û wexto ke derbaz benê zî vanê dayî piro. Şefîk Bag 6ê teşrîna verêne 2020î de ame înfazkerdiş. Gelo Bag kam o? Se keno? Seba çi debarê bi qaçaxtî keno. Ebexê Wanî de ciwîyeno. Na herême de dewanê sînoran de kar çin o. Kes nêxebitêno. Bi hawayêkê ganî debara xo bikerê la netîceyê kaçaxtî de zî yenê  înfazkerdiş. Kes zî veng nêvejeno. Seba gumanbaran zî polîtîkaya bêcezaverdayîşî yena kerdiş.”
 
‘Pêwa şahidan ceza nêna dayîş’
 
Burcuye bale ant serê polîtîkayê bêcezaverdayîşî û wina vat: “Pêwa şahidê serebûtan, pêwa delîlan, polîtîkaya bêcezaverdayîşî yena kerdiş. Seba nê zî no sîyaset o. Seba gumanbaran, seba nasnameyî ceza nênê dayîş. Netîceyê teqîyayîşê mayîne de tutêkê destê xo vînî kerd. Ma avûkatî dir pêvînayîş kerd. La kamerayêkê demê teqîyayîşî bianco çin o. Derheqê herêma mayînî de tabelayêkê çin a. No zaf girîng o. Dewa Karahîsarê Sarayî ya Wanî de 3ê Temmuze de wesayîtêkê multecî ci de bî, ame gulevarankerdiş û tutêkê dinyaya xo bedelna. Xeylêk kesî birîndar bî. Derheqê nê de raporêkê yeno amadekerdiş. Me zabitname waşt la nêdayî ma. Ma şawitî emniyet. La zabitname nêdayî ma. Komîsyonê koçberî eleqeder beno. Xeylêk meslegdarê ma babete taqîb kenê.”
 
Tedbîr nênê girewtiş do binpaykerdiş dewam bikerê
 
Burcuye vat, 20ê hezîrane de mezraya Sersul a taxa Xaşkanî ya girêdayê Elbaqî de leşkeran ke waştêne welatijo bi nameyê K.A destbend bikerê, bi deqeyan gule veradayê hewa, cinîyan derb kerdê û vat: “Seba destbendkerdişê serê nê merdiman de operasyonêkê pîl kerdî. No bi tena sereyê xo binpaykerdiş o. Ganî tedbîrî bêrê girewtiş yan zî do binpaykerdişî dewam bikerê. Reyna taxa Kiratî ya xeta sînorê Îranî yê Elbaqî de 26ê Temmuze de tutêkê bi nameyê H.E yo 16 serre ke pes çêrnayîne, netîceyê teqîyayîşêkê leşkerî de birîndar bi. La kamereya 360 derece ya qerekole cayê serebûtî nêanto. Avûkatan cigêrayîş kerd û fam kerdî ke demê serebûtî kamera de çin ê. No zî mojneno delîlî dimayê serebûtî ameyê sîyakerdiş.”