Mûsa Anter kuçeyê ke ame qetilkerdiş de ame yadkerdiş

  • 16:44 20 Êlule 2022
  • NAROJANE
 
AMED - Rojnameger û nuştox Mûsa Anter 30in serrgêra qetilkerdişê xo de, kuçeyê ke ame qetilkerdiş de ame yadkerdiş.
 
Platformê Rojnamegerê Cinîyan ê  Mezopotamya (MKGP), Komeleya Rojnamegeran ê Dîcle Firatî (DFG) seba vîrardişê Apê Mûsa (Anter) ke 20ê Êlule serra 1992ine de Semtê Seyrantepe yê Amedî de amebi qetilkerdiş, merasîmê yadkerdişî kerd. Merasîmê yadkerdişî Kuçeyê 442ine Taxa Cumhuriyetî ya Seyrantepe ya Amedî de ame organîzekerdiş. Vîrardiş de lajê Mûsa Anter, Dîcle Anter, DFG, Platformê Rojnamegerê Cinîyan ê Mezopotamyayî (MKGP), Partiya Herêmê Demokratîke (DBP), Partîya Demokratîke ya Şaran (HDP), parlamenter Îmam Taşçier û Gulistan Kiliç Koçyîgît, merdime tepişteyan ê nêweşan, Komeleya Paştdayîşê bi Keyeyê Tepişte û Hikûmwerdoxan reyde (TUHAY-DER), Hewldayîşê 78ine ê Amedî, rojnameger Huseyîn Aykol û xeylêk kesê bînî amade bî.
 
'Guleyê ey rê ginayo piro, ziwanê şarê kurdî, cigêrayîşê heqîqetî ame vistiş’
 
Vîrardiş de Hemsereka DFGyî Dîcle Muftuoglû diyar kerd ke zanyarê şarê kurdî, mamosteyê rojnamegerê kurdî Apê Mûsa 30 serrî verê, kuçe de ameyo qetilkerdiş û wina vat: “Guleyê ke ye rê ginayo piro, ziwanî rê dayê piro, cigêrayîşê heqîqetî dayî piro. Waştibî bi qetilkerdişê Apê Mûsa reyde şarê kurdî bêveng bikerê û bêqelem verdê. Apê ma yo Mûsa nê kuçe de ame qetilkerdiş û qelama ey mîyanê gonî de mend. Labelê meslegdarê ey hema zî rastîyan nusenê. Cengîz Altûnan, Gurbeteliyan, Ferhat Tepeyan, Denîz Firat û Nûjiyan Erhanan ra înan dewr girewt û ma rê verdayî. 16 kedkarê çapemenîya azad û meslegdarê Apê Mûsa seba ke heqîqet şarî dir pare kerdêne, 16ê hezîrane de ameyî tepiştiş. Ma tîya reyna vanê; ê vengê ke hewl dayîne rastî biresnê şarî û nê oxirî de ameyê qetilkerdiş, rûmetê ma yê. Ma cayê Apê Mûsa ci de ameyo qetilkerdiş, reyna veng kenê; la ameyo qetilkerdiş reyna veng dane; ma qelema Apê Mûsa yê. Ma generalê ey qijî yê. Ma meslegdarê ey yê û do têkoşînê heqîqetî vera nêdê.”
 
'Tepişteyî virazyayî la ma reyna rayîr ra şîyayîşî xo dewam kerd’
 
Rojnameger Huseyîn Aykolî zî wina vat: “Tepişteyî virazyayî la ma reyna rayîr ra şîyayîşê xo dewam kerd. Ez nêameya tîya ke nefretê hemverê kiştoxê Apê Mûsa vajî. Ez ameya tîya ke deynê xo yê seba Apê Mûsa bidî. Ka to ma senîn verdabi, ma wina nêyê. A roje ra heta nika ma nêzdîyê 50 rojname vetî, radyoyê ma virazyayî. Televîzyonê ma estê ke seba pêro dinya weşan kenê. Her neteweyêkê ajansê xo esto. Ma nê oxirî de şehîd bî û ameyî tepiştiş. Ajansê ma zî sey rojnamegeran ameyî girewtiş. Nika çîyê ke kurdî ciwîyenê ma do pêro dinya reyde pare bikerê. Bi 33 serrî yo ez tîyaye ya. Ciwanê emrê tutanê mi, tornê mi  nika pêro çapemenî de yê. Do roj bir oje pîl bibê.”
 
'Tarîx de xeylêk reyan hewl dayî ke şarê kurdî çin bikerê’
 
Dima ra zî Parlamenterê HDPyî yê Amedî Îmam Taşçier qisey kerd û vat: “Tarîx de xeylêk rey hewl dayî ke şarê kurdî çin bikerê. Apê Mûsa vat; ‘ma nê qebûl nêkenê.’ Seba nê zî şarê kurdî nuşteyî nuştî. Coka 70 serrîya xo de kuçeyêkê de ame qetilkerdiş. Heta ke no sîstem wina dewam bikero, do kesê sey Apê Mûsa zî her bibê. Beno ke Apê Mûsa o wext ten abi la nika bîyê bi milyonan.” 
 
Dimayê qiseykerdişan, beşdaran sloganê “Kesêk nêeşkeno çapemeniya azad bêveng bikero” berz kerdî û heta cayê Apê Mûsa ci ameyo qetilkerdiş, rayîr ra şî. Beşdaran, qurnefîl da cayê ke Apê Mûsa ameyo qetilkerdiş û yadkerdiş peynî bi.