Kaykerdoxê Tîyatroyê Bajarê Amedî bi kayê newe vejênê serê sehne

  • 16:14 21 Êlule 2022
  • NAROJANE
 
 
AMED - Kaya Dek û Dolabê Scapenî yê Tîyatroyê Bajarî yê Amedî kay keno, eleqeyêkê pîl vîneno. Kaykerdoxan ra Nurşen Adiguzele wina vat: “Kaya ma resena xeylêk hetan û eynî wextî de seba  xebatê ma Kurdkî yê, xeylêk wareyî seba ma ameyê qedexekerdiş.”
 
Tîyatroyê Bajarî ê Amedî kayê bi nameyê Dek û Dolabê Scapenî 17ê êlule de ame kaykerdiş û do heta 23yê êlule dewam bikero. Kay eleqeyêk pîl vîneno. Kayê hetê nuştoxo Fransî 1671 de ameyo nuştiş, di ci ra cinî 8 kesî kay de kay kenê.  Rejîsorîyê kayî Ozcan Ateş keno û hetkarîya rejîsorî zî Şîlan Alagoz kena.
 
Kaykerdoxê Dek û Dolabê Scapenî Nurşen Adiguzele derheqê qedexeyê hemverê hunerê Kurdî û kayê ke kay kenê de ercnayîş kerd.
 
‘Ma Kurd ê û xebatanê xo bi Kurdkî kenê’
 
Nûrşene dîyar kerd ke no demêkê derg o serê kulturê Kurdî û Kurdkî de xebatan kenê û wina vat: “Bêguman her tim xeylêk serebûtê awarte vejênê vernîya ma. La ganî seba ma nêbo problem, seba ke ma Kurd ê û xebatanê xo bi Kurdkî kenê. Ganî no problem seba tu embazê ma nêbo problemêk. Ma seba kayanê xo vejênê turneyan la seba ziwanê ma Kurdkî yo xeylêk ca de ma qedexe kenê. Dima ra zî rewşêka kayî ameyê qedexekerdiş, yenê qebûlkerdiş. No zî komîk o. No seba ma astengî nêyo. Belê qedexe kenê û destur nêdanê ma karê xo bikerê. La reyna ma xebata xo dewam kenê. Kuçeyan û salonan de xebatê ma dewam kenê.”
 
‘Her çar hetê dinya ra temaşekerdoxê ma estê’
 
Nûrşene wina dewam kerd: “Salonê ma zaf bi coş pirr benê. Ma seba eleqeyê şarî zaf kêfweş ê. No eleqeyê enerjiya ma di qatî zêde keno. Ma wazenê şarê ma paştdayîş bido ma. Xora ma qet tena nêverdayî. Her çar hetê dinya ra temaşekerdoxê ma estê û ma zî benê hemkarê a enerjî. Ma naskerdişê kayanê xo û serkewtişê xo de deyndarê tîyatro yê Bajarê Amedî yê. Kayê ma resenê xeylêk hetan. Girseyê temaşekerdoxan de Hinek Henek hîna zêde kewt vernê.”
 
Nûrşene da zanayîş ke kayê Dek û Dolabê Scapenî hetê Molière ameyo nuştiş û reya ewil 17ê êlule de ame kaykerdiş, venga kesê ke tîyatro ra hes kenê kerd.
 
Derheqê Dek û Dolabê Scapenî de
 
Kayê Fransizî hetê nuştox Molîere ra 24ê Gulana 1671 de yewin rey tîyatroyê Palaîs Royal ê Parîsî de bi hîrê perdeyi ame kaykerdiş û kayêkê komedî yo. No berardiş kayê, ‘Phormîon’ ê hetê nuştoxê kayan ê Grek Terentîus ra ameyo nuştiş, tîyatro ra ameyo açarnayîş.
 
Qehremanê kayî Scapîn ke xîlekar û duzenbaz o, her tim bi zûran û dolaban cuya xo de hewl dano ke bikewo vernîya her kesî. Xo zaf  ecibneno û karekterêk bi kîbîr o. Scapîn vano qey çîyêk ke nêkero çin o. La eynî wextî de serê dîplomasî de zî xeylêk jîyatî yo. Kesê bîn yê kayî de zî hema wina sey kuklayekê hemverê yewbînan de dano kaykerdiş. Heto bîn ra zî hedefê ke hetkarî bido di kesê bînî estê. Seranserê kayî de nê hedefê xo de maneno.