Melîke Aydin

 

ÎZMÎR - Tepişteya nêweşa kanseri Fatma Ozbaya ke zîndanê Şakranî de tepişte ya, pêwa birînanê linganê aye nêberdê doktor. Avûkatê aye Erdogan Akdogan da zanayîş ke Fatma û tepişteyê nêweşî wayîrê heqê têduştî yê dermankerdişî yê û ganî hemverê na rewşe de têkoşînê komelî bêro dayîş.

 

Tepişteya nêweşa kanseri Fatma Ozbaya 57 serrî Zîndanê Cinîyan ê Şakranî de tepişte ya û rewşa aye her ke şina giran bena. Fatma ke verê zîndanê Erziromî de bî, waya aye Gulser Ozbay ke aye zî uca de bî, ewnîyayîne ci ra la Gulsere surgunê Şakranî kerdî û netîceyê muracatî de Fatma zî surgunê Şakranî ameye kerdiş. Fatma ke Erzirom de 13 rojî cezaya hucre dabî, Şakran de 9 rojî cezaya hucreyê bînî girewte.

 

Seba nêweşîya Fatma vila bîya, vera ke sewqê doktorêkê pisporî bikerê, kerdî hucreyê yew kesî. Avûkat Erdogan Akdogan derheqê  rewşa Fatma de ajansê ma rê qisey kerd.

 

‘Karneyê Şakranî xeylêk xirabe ya’ 

 

Erdoganî da zanayîş ke karneyê Şakranî heqê merdiman de xeylêk xirabeye ya û vat: “Prosesê pandemî de caardişê karantîna û seba dermankerdiş nêameyîne kerdiş, xeylêk problemî vejîyayî werte. Demê peyîn de sewqkerdişê nêweşxaneyan de helwestê cendermeyan, doktorê bi kelepçeyî dermankerdiş kenê, derheqê tepişteyan de vatişê sey; ‘na terorîst a’ vanê û derman nêkenê. Bêguman Fatma zî nê prosesî de bêpar nêmende. Bi xebatkarê weşîye yê asayîşî reyde problem ciwîya. Tewr peyîn demê sewqkerdişî de tepişteyê ke ameyî derbkerdiş, estbî. Cipersayîşê dîsîplînî ame destpêkerdiş.”

 

‘Bêcidiyetîyêkê pîl’

 

Erdoganî dewam de wina vat: “Doktorê revîrî vera ke teşîs bikero, derman dano Fatma. Fatma nêbenê doktorêkê pisporî. Vera ke nêweşîya aye fam bikerê, derman danê. Tehlîlê gonî nênê kerdiş û no zî bêcidiyetî mojneno. Nê caardişî tena hemverê Fatmaye nêyo, hemverê pêro tepişteyan o.”

 

Erdoganî qiseykerdişê xo wina dewam kerd:: “Mekanîzmayê edlî yê girêdayeyê dewlete, ganî qanûnê xo bi ca bîyaro. Ganî goreyê heqê têduştî û rumetî yo ke weşîye têbigêrê. ATK û zîndanî agêrayî sazgehê înfazî. Nê cayê açaryayê  cayê dardekerdişî yê ke nameyê înan nêameyê ronayîş.”

 

‘Ganî Fatma û heme tepişteyê bînî bêrê tahlîyekerdiş’

 

Heto bîn ra Erdoganî da zanayîş ke bi Fatmaye reyde nêweşîya helênayîşê esteyan û nodulê qirikî zî esto û babeta nêweşî de wina vat: “Prosesê kemoterapî, radyoterepî derbaz kerda û dermanê aye giran ê. Demêkê derg o tepişte ya. Mumkin nêyo nê şertan de biciwî yo. Ma bi rewşêke dişmin zî dişminê xo rê wina nêkeno de ameyê rî bi rî. Ganî pêro nêweşê tepişteyî bêrê veradayîş.”

 

‘Zîndanî bîyê zîndanê modern’

 

Erdoganî vat, sazgehê sey CTP û efûyî, xebatê komîsyonê zîndanan yê rêxistinê heq û rêxistinê avûkatan bibo zî netîceyêkê nêno girewtiş û wina vat: “Tu waştişê m abi ca nênê. Ma zanê ke zîndanî sey rewşa modernî yê zindanê 12ê êlule dewam kenê. Prosesê pandemî de binpaykerdişê heqan vejîyayî sewîyeya tewr berz. Dadgeha Heqê Merdiman ê Ewropayî (DMME) mîyanê xo de dirîtîyêkê keno. Serranê 1990î heta ewro Tirkîya de goreyê îqtîdaran form girewto. Zîndanî rojeva DMMEyî de nêyê. Bêguman ma do reyna deweyan berê uca. Bawerîya ma çin a, la ma do berê. La wezîfeyê ma babeta  ma zîndanî ya. Ganî zîndanî bibê rojeva ma û ma bibê vengê înan.”