Zîndanê Şakranî de caardişê kêfî: Avûkatan muracatê ÎHDyî kerd

  • 14:54 23 Êlule 2022
  • NAROJANE
 
ÎZMÎR - Avûkate Dîlancan Ateş û Nehîr Bîlecen waştî derheqê sînorkerdişê cil û belgan yê tepişteyan dir pêvînayîş bikerê, la ameyî astengkerdiş. Avûkatan da zanayîş ke karmendê zîndanî vato ke di avûkatî eynî wextî de nêeşkenê bi muvekîlekan reyde pêvînayîş bikerê. Avûkatan muracatê Baroyê Îzmîrî kerdî.
 
Zîndanê Tirkîya û Kurdistanî de binpaykerdişê heqan her ke şino zêde beno û tepiştişî hemverê nê caardişan bi reaksîyonê. Demêko derg bi, rêziknameyê derheqê cil û belgan de rojeve de bi û Zîndanê Şakranî hewl dayî ke bi ca bîyarê. Îdarekarîya zîndanî seba tepişteyan demê pêvînayîşî akerde, girewte û telefon de sînorkerdişê cil û belgan ard.
 
Sereka Komeleya Huqûqnasê Hemdem avûkate Dîlancan Ateş û Vervatoxa Zîndanan ê ÎHDyê Îzmîrî avûkate Nehîr Bîlecene waştî derheqê babete de bi tepişteyan reyde pêvînayîş bikerê la ameyî astengkerdiş. Avûkatan da zanayîş ke karmendê zîndanî vato ke di avûkatî eynî wextî de nêeşkenê bi muvekîlêke reyde pêvînayîş bikerê û vat, no çî babeta vatişî ya, Baroyê Îzmîrî de neql kena.
 
‘Qerarê mudurê zîndanî’
 
Sereka Komeleya Huqûqnasê Hemdem avûkat Dîlancan Ateşe da zanayîş ke karmendê cayê qeydê zîndanî vato ke muvekîlêke eynî wextî de nêeşkeno bi du avûkatan reyde pêvînayîş bikero û vat: “Na rewşe huqûqî bo zî ganî belgeyêkê nuşteyî ke qerarêkê wina esto yan ney bi mojnayîne ma. Karmend bi telefon qisey kerd û vat, qerarêkê wina çin o la mudûrê zîndanî Meltem Babaoglu nê qerarî dayo û vat ke ‘vînenê wa bivînê la nêvînenê zî wa şêrê.’ Karmendî wina neql kerd. Nê ser de ma vat, ma nê bêhuqûqî qebûl nêkenê. Karmendî reyke bîn vat, 'ez nêeşkena çîyê ke bikerî bi dozgerî reyde pêvînayîş bikerê.’ Maş î verê dozgerî. Dozgerî vat, no reya ewilî yo ke çîyêkê wina reyde yena rî bir î. Ma zî vat, pêvînayîşê Zîndanê Egeyî de reya ewil ma çîyêk wina vînenê. Nêzdîyê saetêke ma vindarnayî. A mabêne de ma rewşa ekonomî neql kerd.”
 
Dîlancane vat, ê sey huqûqnasan nê caardişî qebûl nêkenê û wina qedêna: “Seba tepişteyî bi binpaykerdişê heqan reyde nêrê rî bi rî, çi destê ma ra bêro ma do hem çalakîyê îstîmlakî û hem zî bernameyan dewam bikerê.”
 
‘Caardişê kêfî’
 
Vervatoxa Zîndanan ê ÎHDyê Îzmîrî avûkate Nehîr Bîlece zî wina vat: “Ma vat, no bêhuqûqî yo. Seba ke ma problemêkê winasî dir nêameyî rî bi rî. Verê yewî zêdeyêr tepişteyan pîya pêvînayîş kerdêne. Mudurê zîndanê Şakranî Meltem Babaoglu şexsî nê helwestî nîşan dayo. Meltem Babaoglu karmendê zîndanî ra vat, yew bi yew kewenê pêvînayîşî, eke nêkewenê wa şêrê.”
 
Bahaneyê nuşteyî çin o
 
Nehîre dewam de wina vat: “Demo ke ma seba pêvînayîşê dozgerî bikerê, ma endamê heyetê baroyê Îzmîrî Mehmet Baran Selanîkî gêrayî. Mehmet Baranî vat, na rewşe bêhuqûqî ya. Vat, ganî qerarê nuşteyî pêşkêş bikerê. Bi telefon hewl da dozgerê ke zîndan ra berpirsîyar o bigêro. La vatî, pêvînayîşêkê bîn yê dozgerî esto. Pêvînayîş bi ca nêame. Ma nêzdîyê saetêke paweyê dozgerî mendî. Ma vat, pêvînayîşê ma, ameyo astengkerdiş, nêverdayê wezîfeyê xo bikerê. Dimayê saetêke vatî, qerarê nuşteyî çin o. Ma zî bi muvekîlê xo reyde pêvînayîş kerd.”
 
‘Tecrîd ameyo girankerdiş’
 
Nehîre wina qal kerd: “Bi qerarnameyê ke vejenê, binpaykerdişê heqan zî zêde bîyê. Muvekîlê ma vatî seba boyaxkerdişê koxuşêkê tepişteyê edlî ardê koxuşêkê mabêne di koxuşê siyasî. Tutê tepişteyî yê edlî zî estbî. Demo ke koxuşan vurnenê zî cigêrayîş kenê. Cigêrayîş de verê çimanê  tutan de sereyê bebekê pêkayan tira kerde. Dimayê nê tutî pêro roj bermayê.”
 
‘Kitabî nênê dayîş’
 
Nehîre vat, yew caardişê bînî zî nêdayîşê kitaban o û seba dayîşê kitaban zî tarîxê dîyarkerde estê û vat: “Tepişteyî nêeşkenê kitaban bigîrê. Seba wendişê kitaban zî, bahaneyê rewşa baş pêşkêş kenê. Îşkence û tecrîd dewam keno.