Rojhelatê Kurdistanî de xoverdayîşê şarî dewam keno

  • 14:33 26 Êlule 2022
  • NAROJANE
 
MERKEZÊ XEBERAN - Dimayê kiştişê Jîna Mahsa Amînî, Rojhelatê Kurdistanî û Îran de protestoyê girseyî bi ca ameyî. Xoverdayîşê ke kuçeyan pêwa tedayan û hêrişan heta ewro zî dewam kerd.
 
Jîna Mahsa Amînîya 22 serrî ke 13ê êlule de Îran de hetê polîsanê "exlaqî" ra bi bahaneyê "porê aye aseno' rastê îşkence amebî, 16ê êlule de nêweşxane de dinyaya xo bedelnabî. Dimayê merdişê Jînaye şarê Rojhelatê Kurdistanî û Îranî hemverê rejîmê Îranî de sere wedernayî.
 
Grewa ke 19ê êlule de seranserê welatî de dest pêkerd, vilayê bi desan bajajaran bi û çalakîyê protestoyî yê bi girseyî ameyî kerdiş. Cinîyan bi sloganê, "Cinî ciwîyayîş azadî" kuçeyan de rayberîya çalakîyan kerd. Sewbîna çar hetê dinya zî paştdayîşê çalakîyê Rojhelatê Kurdistanî û Îranî ameyî kerdiş.
 
Vizêr şan de zî bajarê Sine, Urmiye, Bokan û xeylêk bajaranê bînî de şar vejîya meydanan û rejîmê Îranî şermezar kerdî. Bi eynî hawa bajarê Tahran, Esfehan, Buşehr, Zahîdan, Terbîz, Şêraz, Lahîcan û xeylêk bajarê bînan de zî protestoyî dewam kenê. Çimeyê hemverî vanê ke protestoyî tewr tay 146 bajaran de 31 eyaletan de vila bîyê.
 
Çimeyê nêzdîyê rêxistinê Mucahidî Şarî yê muxalifê Îranî diyar kerdî ke 146 bajaran de tewr tay 8 hezar kesî ameyî destbendkerdiş. Eynî çimeyî de lîsteyê nameyê kesê ke protestoyan de ameyê qetilkerdiş zî eşkera kerd. Sewbîna goreyê Rêxistinê Heqê Merdiman ê Îranî (ÎHH) ke merkezê ci Oslo yo, dîyar kerd ke tewr tay 57 çalakîkerî dinyaya xo bedelnayê la heta nika hetê merdişan de zanayîşêkê rast nêameyo girewtiş.
 
Komîteyê Pawitişê Rojnamegeran (CPJ) ke merkezê ci Amerîka yo, dîyar kerd ke 17 rojnamegerî ameyê destbendkerdiş.
 
Xêrcê tepiştişan rejîmê Îranî hewl dano bi rayîrê birnayîşê xetê înternetî û telefonê keyan, vengê protestoyan bibirno. Kampanyayê înternetî yê Îranî vîzêr şan de seranserê Îranî de xetê înternetî birna.