Gulîstan Dursun

 

STENBOL- Endama Koordînasyonê Cinîyanê Ciwanan yê HDPyî Ronahî Tunçe da zanayîş ke yewine rojeva ciwanan ya serra 2023î do tecrîd û têkberdişê îqtîdarî ba. Ronahîye wina vat: “Serra 2023î de do azadî hîna nizdî biba. Do têkoşîn berz bibo. Serkewtiş do bi taybet yê cinîyan û ciwanan û pêro komelî bo.” 

 

Tecrîdê serê Rayberê PKKyî Abdullah Ocalanî 24 serrî yo dewam keno û no tecrîd tesîrê xo pêro komelî ser de zî keno. Bi taybetî cinî û ciwanî na rewşe ra xeylê tesîr benê. Koordînasyonê Cinîyanê Ciwanan yê Partîya Demokratîke ya Şaran (HDP) ke hemverê polîtîkayanê îqtîdarî de têkoşîn dano, 2022î de zî vera heme zext û hêrişan raşteyan nêterikna.

 

‘Ciwananê rêxistinkerdeyan rê proses azad’ 

Meclîsê Ciwanan yê HDPyî 24ê Kanûne de Stenbol de konferas pê ard. Meclîsê Ciwanan ke konferansê xo bi sloganê ‘Bi ciwananê rêxistinkerdeyan reyde proseso azad’ pê ard û dîyarîya Evîn Goyî (Emîne Kara), Mîr Perwer û Abdurrahman Kizilî ke Merkezê Kulturî yê Ahmet Kayayî yê Parîsî de netîceyê suîkastî de dinyaya xo bedelnayî, kerd. 

 

Endama Koordînasyonê Cinîyê Ciwan û Meclîsê Ciwanan yê HDPyî Ronahî Tunçe derheqê prosesî de qisey kerd.

 

‘Ciwan kewenê tora tîryakî’

 

Ronahîye da zanayîş ke serra 2022î xeylê zehmetin bî, şer û tecrîd vilayê her cayî bî û wina qiseykerdişê xo dewam kerd: “Bi taybetî serê ciwanan de tedayê girdi estî. Faturaya şer û tecrîdî ciwanan, cinîyan û komelî rê birîyena. Feqîrî zêdîyena. Krîzê ekonomî vera ciwanî kewenê tora tîryakî. Qet şik çino ke nê caardişî bi destê îqtîdarî virazîyenê. Îqtîdar bi no hawa ciwanan gecilneno. No prosesî de sloganê ‘Ma tîryakî têk benê cuye newe ra awan kenê’ estbî. Ma turnuva û atolyeyan pê ardî.” 

 

‘Ciwan hêzê serkêşî yê’

 

Ronahîye dewamê qiseykerdişê xo de nê çîyan ard ziwan û vat: “Ciwan hêzê serkêşî yê. Potansîyelêk înan yê gird esto. Îqtîdar zî wazeno nê çîyî bigecelno. Îqtîdar zano ke do bi destê cinî û ciwanan şêro. Do cinî û ciwanî sîstemê îqtîdarî xira bikerê. Raştîyêk ma ya wina esta. Cinî û ciwanî mohrê xo dayî serra 2022î ro.” 

 

‘Yewine rojeva 2023î tecrîd o’

 

Ronahîye qiseykerdişê xo wina qedênaye: “Ma do serra 2023î de xo hîna zêde rêxistin bikerê. Yewine rojeva 2023î tecrîd o. Ma do her ca de xo biresnê cinîyan. Ma do keye bi keye, tax bi tax û kuçe bi kuçe xo rêxistin bikerê. Ma do atolyeyê tîryakî pê bîyarê. Ma do 2023î de têkoşînê xo hîna gur bikerê. Serkewtiş do bibo yê cinî, ciwan pêro komelî. No îqtîdar do bi destê ciwanan şêro.”