‘Nobeta Edaletî’ ya keyeyê Şenyaşarî 687 rojî yo dewam kena

  • 15:56 24 Çele 2023
  • NAROJANE
 
RIHA - Çalakîya "Nobeta Edaletî" ya keyeyê Şenyaşarî 687 rojî yo dewam kena. Keye, serê hesabê xo yê medyaya dijîtale de nê parekerdişî kerd. “Ma heqê xo kesê ke nê zulmî rê bêveng manenê, helal nêkenê.”
 
Nobeta edaletî ya keyeyê Şenyaşarî ke 9ê adara 2021ine de dest pêkerd roja 687ine de dewam kena. Seba nêweşîya xo Emîne Şenyaşare ewro tewrê nobete nêbî. Lajê Emîne Şenyaşar Ferît Şenyaşar bi tena serê xo Edliyeyê Rihayî de nobeta xo dewam kerd.
 
Heto bîn ra keyeyê Şenyaşarî, serê hesabê xo yê medya dijîtalî de hesabê Wezîrê Edaletî Bekîr Bozdagî etîket kerd û parekerdiş kerd û vat: “Nêweşxaneyê dewlete de cuya merdiman peynî kerdî, beno ke merdimî sey çîyêk nêbîyo biciwîyo? Eke to bizanayîne edalet emrê Homayî yo, şima do nê bêedaletîyê Rihayî vindarnayîne. Ma heqê xo kesê ke nê zulmî rê bêveng manenê ra helal nêkenê.”