AMED - Cinîyê ke seba roniştişê dewaya Ayşe Gokkan do siba bêro vînayîş veng dayî û vatî, "Seba ke şexsê Ayşe Gokkan de ma hemverê polîtîkayê dişminî yê hemverê cinîyan vejênê û têkoşîn pîl bikerê, ma venga heme cinîyan kenê ke siba bêrê verê Edlîyeyê Amedî."

 

Dewaya ke Verfeka Demî ya Tevgerê Cinîyan ê Azadan (TJA) Ayşe Gokkan 9ine Dadgeha Cezaya Giran ya Amedî de ci ra ameyîne muhakemekerdiş, cezaya 30 serrî zîndanî yê dadgehe bi îdayê, "bi zanebîyayîş hetkarî daya rêxistine" hetê Dadgeha Berzî ra amebî betalkerdiş. Roniiştişê ewilî yê beşê ke ceza amebî birnayîş, ameye betalkerdiş, 16ê Teşrîna Peyêne 2022ine de 9ine Dadgeha Cezaya Giran ya Amedî de ameye vînayîş. Roniştiş de Ayşe waştişê redkerdişê dadgerî reyna kerd. Dadgehe nê waştişî red kerd û roniştiş taloqê 18ê Çeleyî kerd.

 

Ayşeya ke roniştişê 18ê Çele de waşt bi tercumanêk kurdî îfade bida, seba problemê xo yê eşnawitişî û problemê Sîstemê Agahdarîya Veng û Dîmen (SEGBÎS) nêeşka îfade bida. Avûkatê aye seba problemê ke ameyî ciwîyayîş, nêwaştî Ayşe bîyarê roniştişî, dadgehe qerar da ke Ayşe roniştişê bînî ra amade biba û roniştiş taloqê 30ê Çeleyî kerdibi.

 

Cinîyan venga tewrbîyayîşê roniştişê dewaya Ayşe ke do siba bêra vînayîş kerdî.

 

'Bi helwestê xo hêz danê ma'

 

Endama Heyetê Îdarekarî ya Komeleya Cinan a Rosaye Elîf Turan, dîyar kerd ke Ayşe Gokkan yew raybera tevgerê cinîyanê kurdan a û dîyar kerd ke Ayşe demêk derg o hetê dewleta camêrdan ra ameya tepiştiş û vat: "Ma nê ra nêvenê tepiştiş, ma vanê ‘rehîn ameya girewtiş'. Embaza ma Ayşe Gokkan bi nasnameyê xo yê  kurdewarî û cinî, bi vindertişê xo yê dadgehan moral û motîvasyon dana ma pêrûne. Helwestê embaza Ayşe Gokkan hêzê ma tewr zêde keno. Sey rêxistinê cinîyan ma do tewrê roniştişê dewaya ci ya ke do 30ê aşmî de bêro vînayîş, bibê. Ma venga pêro rêxistinê cinîyan kenê ke amade bibê û paştdayîş bidê hemraya ma Ayşe Gokkan.”

 

'Seba pêro cinîyan têkoşîn kena'

 

Aktîvîsta heqê cinîyan Aklime Hanas zî reaksîyon vera tepiştişê Ayşê Gokkan mojna û vat: "Ayşe cinîyêka kurd a, seba nê hetê dewlete ra ameye tepiştiş. Aye kesêk a ke seba heme cinîyê dinya, bi xususî seba têkoşîn dana ya. Bêrê ma roja dişeme roniştişê Ayşe de cayê xo bigîrê."

 

'Ma qanûnê sucî yê dişminî qebûl nêkenê'

 

Tewr peyîn avûkata Ayşe Gokkan Ozum Vurgun vat: “Roniştişê dewaya ke şaredara verê ya Nisêbînî û Verfeka Demî ya TJAyî Ayşe Gokkan bi hawayêkê bêhuqûqî ci ra yena muhakemekerdiş do siba bêro vînayîş. Ayşe Gokkan dimayê betalkerdişê cezaya ci hetê Dadgeha Berzî ra nêardî roniştiş. Labelê roniştişê verî de zî seba helwestê hêrişkar ê serekê dadgehe ya hemverê muwekilê ma Ayşe Gokkan û avûkatanê ma ra tu pawitiş nêameyo kerdiş. Pêwa nê zî Dadgeha Cezaya Giran seba zêde dayîşê cezaya pereyan, dosya dadgeha herêmî ra reyke bîn şirawit. Ma helwestê bêhuqûqî yê dadgeha herême hemverê ma û muwekîla ma qebûl nêkenê. Şexsê Ayşe Gokkan de ma cinîyan dawetê Edlîyeyê Amedî ke hemverê polîtîkaya dişminî ya hemverê pêro cinîyan de yena kerdiş, têkoşîn girs bikerê."