Rojda Aydin

 

ÎDIR - Îdir de derheqê 6 camêrdê ke nizdîyê 4-5 aşman destdergî tutêke rê kerdî, bi sucê “destdergêya hemverê tute” de îdîaname ame amadekerdiş. Roniştişê ewilî yê dewaye do 10ê Gulane de bêro vînayîş. 

 

Merkezê Îdirî de 19ê Teşrîna Verêne 2023yî de hetê ajansê ma ra vejîya raşte ke tutêke bi tecawuz û fuhuşî reyde rî bi rî menda. Semedo ke şantaj û tehdîd ameyêne kerdiş tute nêeşkaya qewimîyayîş keyeyê xo rê vaja. Semedo ke tehdîd dewam kerd 27ê Êlula 2023yî de tute şîya Mudirîya Polîsan a Îdirî û qala çîyê ke cuyaya kerda. Tute derheqê kerdoxan de gerre kerdbî. Îfadeyê emnîyet û dozgerîye de vejîya raşte ke 6 camêrd nizdîyê 4-5 aşman destdergê bi tute kerdê û bi şantaj, fuhuş aye rê ameyo kerdiş.

 

Tute îfadeyê xo de vata ke hetê camêrdê bi nameyê Ferhat Angay, Onur Begeç, Vedat Gîden, Boran Yildiz, Murat Altun û Alîcan Begeçî ra bi tecawuzî reyde ameya rî bi rî û derheqê kerdoxan de gerre kerda. Dimayê îfadeyê dozgerîye 27ê Êlula 2023yî de kerdox Onur Begeç, Alîcan Begeç, Vedat Gîden û Murat Altun bi sûcê “Hêrişê cînsî yê hemverê tute” ameyî tepiştiş û şirawîyayî Dezgehê Înfazî yê Girewte yê Tîpê Syî yê Îdirî. Kerdox Ferhat Angayî zî bi şertê kontrolê edlî ameybî verdayîş. 

 

Îdîaname ame amadekerdiş 

 

Dima ke qewimîyayîş vejîya raşte dozgerî îdîaname hadre kerd. Derheqê kerdox Alî Begeç, Boran Yildiz, Ferhat Angay, Murat Altun, Onur Begeç û Vedat Gudenî de bi sûcê “Hêrişê cînsî yê hemverê tute” îdîanameyêk 6 rîpelî ame amadekerdiş. Îdîanameyo ke Mehkemaya Cezaya Giran rê ame şirawitiş, ame qebûlkerdiş. Îdîanameyo ke tede îfadeyê tute ca gêno de îfadeyê keyeyî zî est o. Derheqê 6-7 kesê ke destdergê bi tute kerdî de gerre ame kerdiş. Kerdoxê ke nameyê înan îdîaname de derbaz beno sûcê qebûl nêkerdî. Îdîaname de derheqê kerdox Boran Yildizî de teşrîna verêne ya 2023yî de qerarê cigêrayîşî ameyo vetiş, la hema zî nêameyo tepiştiş. 

 

Dewaya ewil 10ê Gulane de ya 

 

Roniştişê dewaya yê ewilî do 10ê Gulane de 2ine Mehkemaya Cezaya Girane ya Îdirî de saet 09.00î de bêro vînayîş.