RIHA - Dayîkê Aştîye dîyar kerdî ke înan bedelê pîlî dayî û vatî, bêrê ma pîya aştî awan bikerê. Dayîkê Aştîye sewbîna dîyar kerdî ke ê wazenê Rayberê Şarê Kurdî Abdullah Ocalan şertê azad de meclîs de bivînê.

 

Rayberê Şarê Kurdî Abdullah Ocalan 27ê Sibate de vengdayîşê ‘Aştî û komelê demokratîk’ kerd û dimayê nê PKK’yî kongreya xo kom kerd û qerarê feshî da. Gamê ke ameyî eştiş, proses ardî sewîyeyêka bîne. Dewamkerdişê tecrîdê Abdullah Ocalanî ser o şarî dir bêbawerî awan keno. Dayîkê Aştîye derheqê prosesî de qisey kerdî û dîyar kerdî ke ganî azadîya Abdullah Ocalanî pê bêro û meclîs de bêro goşdarîkerdiş.

 

‘Ganî serekê ma azad bo’

 

Aynur Yilmaz dîyar kerd ke aştî çîyêk zehmet a, şer çîyêk asan o û va: “Ganî ma pêro dayîkî dest bidê yewbînan û şer biaçarnê aştîye. Êdî bes o. 50 serrî yo no şer dewam keno. Bi hezaran kesî şehîd kewtî. Wa dayîkî mebermê. Wa tutê ma koyan ra bêrê û dewlete heqê înan bido. Wa îmkan bidê serekê ma û do aştîye bîyaro. Tîya de barê dayîk û cinîyan muhîm o. Ma tutê xo ardî dinya, pîl kerd. Dejê ma pîl o. Wa no şer peynî bo. Pereyê ke şerî rê xerc kenê, wa ciwanan rê xerc bikerê, wa aştîye rê xerc bikerê. Ganî serekê ma azad bo û mîyanê ma de bo.”

 

‘Ma aştîyêk bi rûmet wazenê’

 

Kamîle Kazici wina va: “Aştî pê bêro, belkî berê sînorî abibê, belkî ma şêrê esteyê tutanê xo bivînê. Ma aştîyêke bi rûmet ê di hetî wazenê. Ganî rayberê ma Abdullah Ocalan meclîs de bêro goşdarîkerdiş. Ma wazenê tu dayîkî mebermê, kes nêmiro. Wa zîndanan abikerê. Ganî ma pêro bibê yew û aştî bîyarê. Ma bedelê pîlan da. Gorê lajê mi (Mehmet Kazici) çin yo. No dejêk pîl o.”

 

‘Pêwa her çî ma hetê aştîye yê’

 

Emîne Korkmaz zî wina va: “Ma aştîyêk ke her kes têhet o, wazenê. 8 şehîdê ma est ê. La gorê yewî zî çin o. Ma hetê aştîye yê. Êdî bes o. Aştî pê bêro, ma do şêrê verê şehîdanê xo. Wa dayîkî mebermê. Ma rehet bikerê. Ma aştîyêk mende û bi rûmet wazenê.”