AMED - Hemşaredara Erxenî Bîrsen Azak Bayar derheqê bazarê taxe yê cinîyan ke do Erxenî de bêro awankerdiş de qisey kerd û va: “Bazaro ke ma do bikerê cuye, cinî do berardişê xo, berardişê baxçeyê xo, berardişê keda destê xo biroşê.”

 

Qezaya Erxenî ya Amedî de semedê îstîhdamê cinîyan Bazarê Taxe yê Cinîyan yeno awankerdiş. Muracatê semedê bazaro ke do bêro awankerdiş, mabêne 4 û 30ê êlule de yeno kerdiş. Cinî nê bazarî de berardişê xo, berardişê baxçeyê xo bîyarê tîya biroşê. Hemşaredara Erxenî Bîrsen Azak Bayar derheqê babete de qisey kerd.

 

‘Ma do wareyê rêxistinbîyayîşê cinîyan ê komunal awan bikerê’

 

Bîrsen Azak Bayar dîyar kerd ke semedê tesîrê negatîf yê krîzê ekonomî kêm bikerê û destek bidê cinîyan nê bazarî akerdê û va: “Armancê ma oyo ke ma cinîyê ke berardiş kenê bîyarê têhet û berardişê înan bîyarê bazar. Eynî wextî de ma wazenê semedê cinîyan wareyê îstîhdamî awan bikerê. Semedo ke vernîya şîdetê ekonomî bêro padayîş, ma do wareyê  rêxistibîyayîşê cinîyan ê komunal awan bikerê.”

 

‘Ma cinîyan goşdarî kerd’

 

Bîrsen Azak Bayar va muracatî 4-30ê êlule de yenê kerdiş û va: “Ma sey cinîyê Erxenî ewilî fîzîbîlîteyê bazarî kerd. Ma cinîyan dir ameyî têhet. Ma waştişê cinîyan goşdarî kerd û pêşnîyazîyê înan ê wareyê ekonomî de tespît kerd. Cinîyan hetê ekonomî de waştişê cayê karî kerdî. Cinîyan va ke wazenê çîyê ke baxçeyê xo berarde kenê, berardişê keda destê xo biroşê. Ma zî nê meclîsê xo yê cinîyan de erjna. Ma qerarê awankerdişê bazarî girewt.”

 

‘Binesazgehêk ke şino koperatîf eşkeno bêro awankerdiş’

 

Bîrsen Azak Bayar dîyar kerd ke armancê înan oyo ke binesazgehê ke şino koperatîf awan bikerê û va: “Ma vernê de sey bazar fikrîyenê. Dima ra ma wazenê ma bêrê têhet û binê sîwaneyêk de bêrê têhet. Muracatê ma dewam kenê. Ma cinîyê ke bazar de bica benê bace nêgînê. Ma do her tim destekdayîşê xo dewam bikerê.”