WAN - Mergê bişik yê wendekara Zanîngeha Yuzuncu Yilî ya Wanî Rojîn Kabaîş ser o serrêke derbaz bî la pêwa nê hema dosya nêameya roşnkerdiş. Cinîyan semedê rayîrşîyayîşo ke do 27ê êlule de semedê Rojîn Kabaîş do bêro organîzekerdiş, veng da.

 

Wendekara Zanîngeha Yuzuncu Yilî ya Wanî (YYU)  Rojîn Kabaîşa 21 serrî 27ê êlule 2024ine de dimayê yurdo ke ci de mendêne vejîya, reyke bîn xebere nêamî girewtiş. 18 rojî dimayê vînîbîyayîşê aye cenazeya aye 15ê teşrîna verêne de qeraxê Molla Kasim amî vînayîş. Serê mergê bişik ê Rojîn Kabaîş de serrêke derbaz bî la hema hedîse nêameya roşnkerdiş.

 

Çarçewaya kampanyaya ‘Ma semedê cuye û cuyayîşê xo rêxistin kenê’ do 27ê êlule de saete 18.00ine de semedê AVM yê Wanî heta Kent Meydani rayîrşîyayîşêk organîze beno.

 

Aktîvîstê Têgêrayîşê Cinîyanê Azadan (TJA) semedê rayîrşîyayîşî veng dayî.

 

‘Ma bibê vengê Rojîne’

 

Eylem Oklu wina va: “Bi serkêşîya cinîyan semedê şikdarê Rojîn Kabaîş vejê werte û bêrê cezakerdiş, ma 27ê êlule roja îne rayîr ra şinê. Ma venga pêro cinîyan kenê ke bibê vengê Rojîne.”

 

Halîme Albay zî dîyar kerd ke semedê dosya bêro roşnkerdiş 27ê êlule de rayîr ra şinê û wina va: “Ma venga pêro cinîyan kenê ke ware de pîya bibê vengê Rojîne.”

 

Zeynep Durmaz dîyar kerd ke do 27ê êlule de saete 18.00ine de verê AVMyê Wanî heta Kent Meydani rayîr ra şêrê û pêro cinîyan dawetê meydanî kerdî.

 

‘Çi bi Rojîn Kabaîşe ame?’

 

Felek Erden zî wina va: “Serrêke mergo bişik ê Rojîn Kabaîşe ser o derbaz bî. Ma sey têgêrayîşê cinîyanê kurfan persenê ‘Çi bi Rojîn Kabaîşe ame?’. Persa ke her rey ma persenê, ma do 27ê êlule de reyke bîn bipersê. Çi bi Rojîn Kabaîşe ame? Wa şikdarî bêrê vînayîş, cezakerdiş.”