MERKEZÊ XEBERAN - Heyetê Cinîyan ê Rojawanî ke Almanya de pêvînayîşê xo temam kerd, Swîsre de bi parlamenter, rêxistinê komelî yê sivîlî û şarî dir kom bî.

 

Heyetê Cinîyan ê Vakur û Rojhelatê Sûrîye (Rojava) dimayê pêvînayîşê xo yê Almanya, derbazê Swîsre bî. Heyet, Hemsereka Meclîsê Cinîyan ê Vakur û Rojhelatê Sûrîye Emîne Omer, Verfeka Meclîsê Cinîyan ê Sûrîye Muna El Yusif, Verfeka Komelê Cinîyan ê Zenûbiya Şehrezad El Casim, endama Kongra Star Jiyan Hisên û îdarekara Yewîya Cinîyê Suryanî Jorjêt Bersûm pê yeno.

 

Heyet, destpêkê Meclîsê Federalî yê Swîsre bi parlamenterê SP’yî û endamê Komîteyê Têkilîyê Teberî Fabian Molina dir pêvînayîş kerd. Heyet, pêvînayîş de averşîyayîşê peyîn yê Sûriye neql kerd û dîyar kerd ke ganî heqê cinîyan û pêameyan asayîş de bê. Molina zî bale ant serê modelê demokratîk ê Rojawanî û va, ganî komelê mîyanneteweyî berpirsyarî bigîro xo ser.

 

Heyet, dima ra bi parlamenterê SP’yî û endamê Koma Dostatîya Kurdan dir Carlo Sommaruga dir ame têhet. Pêvînayîş de ame vatiş, dimayê şerê 14 serran semedê viraştoxê demokrasî, têduştî û federal hêvîyêk virazîya, labelê tehlukeyê bêistiqrarî û zextî dewam kenê.