AMED - Semedê prosesê ‘Aştî û komelê demokratîkî’ kampanyaya ‘semedo ke ez aştîye wazena’ amebî destpêkerdiş. Hemsereka TUAY-DER’î Yeter Erel Tuma derheqê kampanyaye de qisey kerd û va: “Wa her kes vajo ‘ez aştîye wazena, cuyêka bi rûmet wazena.’ Û şêrê stand û îmzaya xo bierzê."

 

Rayberê Şarê Kurdî Abdullah Ocalanî 27ê Sibate de vengdayîşê ‘aştî û komelê demokratîkî’ kerd. Seranserê dinya de vengdayîş veng da. Dimayê destpêkerdişê muzakereyî, Komîsyon meclîs de ame awankerdiş, xeylêk hetan dir pêvînayîş kerd. Eynî wextî de tecrîdê Rayberê Şarê Kurdî Abdullah Ocalanî ser o dewam keno. Pêwa nê Komîteya Wezîran ê Konseya Ewropayî (KWKE) semedê ‘heqê hêvîye’ pê bêro, serrêke bîn wext da Tirkîya. Partîya Têduştî û Demokrasî (DEM Partî), sazgeh û dezgeyê sîyasî na çarçewa de kampanyaya îmzayan ê ‘semedê ez aştî wazena’ dayî destpêkerdiş. Kampanyaya îmzayan xeylêk bajarênê Kurdistanî û Tirkîya de dewam kenê.

 

Yew bajaro ke kampanyaya îmzayan ci de dewam kena Amed o. Hemsereka Komeleya Destekdayîşê Keyeyê Tepişteyan dir (TUAY-DER) Yeter Erel Tuma derheqê kampanyaye de qisey kerd.

 

‘Gama ke dewlete û komîsyonî eştê çin o’

 

Yeter Erel Tuma dîyar kerd ke ewil Rayberê Şarê Kurdî Abdullah Ocalanî 27ê Sibate de prosesê ‘aştî û komelê demokratîkî’ dayo destpêkerdiş la hema dewlete û komîsyonî gamêke nêeştê û va: “Têgêrayîşê kurdî derheqê prosesî de çîyo lazim kerd. La pêwa nê hema çîyêk nêameyo kerdiş. 7 aşmî yo dewlete yan zî komîsyonî game nêeştê. Ma bi israr têkoşînê semedê aştî û demokrasî dewam kenê. Semedê ma vengê şarî bidê şinawitiş, ma platformêk awan kerd. Semedo ke ma fek waştişê xo ra vera nêdanê.”

 

‘Ma vengdayîşê xo reyna kenê’

 

Yeter Erel Tuma bale ant serê qerarê KWKE’yî û va: “Tecrîd dewam keno. Ganî proseso ke masaya muzakereyî ci de ameyo destpêkerdiş û sozê aştî ke semedê komelî ameyo dayîş, lezkî bêro destpêkerdiş. Semedê nê ma stand akerd û vengdayîşê xo reyna kerd. Azadîya Abdullah Ocalanî û rayîrşîyayîşê prosesî yê pozîtîf girêdayeyê averşîyayîşê aştîye yo. Derheqê prosesî de bawerîya şarî çin a. Azadîya Abdullah Ocalanî do hêvî û bawerîya şarî zêde bikero.”

 

‘Aştî ferz a’

 

Yeter Erel Tuma tewr peyîn wina va: “No seserre ra  zêdeyêr o her tewir şîdet kurdan rê ame kerdiş. La 52 serrî yo kesêk nê şerî de biser nêkerd. La her kes bitesîr bi. Nê semedî ra ganî aştî pê bêro û ferz o. Semedê cuyêka bi rûmet ganî her kes semedê aştî vengê xo berz bikero. Ganî bêrê stand û îmzaya xo bierzê.”