MERKEZÊ XEBERAN - Heyetê Cinîyan ê Rojawanî Zurîh de rêxistinê cinîyan dir kom bi û semedê çareserîya demokratîke ya Sûrîye vengdayîşê piştgîrîya enternasyonalî kerd. Heyetî bale ant ser rolê Swîsre yê semedê heqê merdiman û demokrasî û mesajê “lazim o hîna zaf aktîf bibo” da.

 

Heyetê Cinîyan ê Bakur û Rojhelatê Sûrîye bajarê Zurîh ê Swîsre de bi rêxistinê cinîyan û grûbanê piştgîrîye dir kom bî. Heyetî derheqê têkoşînê cinîyan, tecrubeyê xoserî û cigêrayîşê çareserîya demokratîke de mesaj da.

 

Heyetê Cinîyan ê Bakur û Rojhelatê Sûrîye saetanê nîmerojî de tewrê weşanê taybetî yê Radyo Lora bîy û derheqê averşîyayîşê Sûrîye û Rojawanî de agahîyî da. Endamanê heyetî dîyar kerd ke armancê serdayîşê Ewropa “awankerdişê Sûrîyeyêka demokratîke” yo.

 

Saetanê şewe de heyet tewrê kombîyayîşê Feministisches Streikhaus (Keyeyê Grevê Femînîst) bîy. Heyet, bi organîzasyonê Komîteya Rojawanî, Meclîsê Cinîyan ê Beriyan û Pirda Wayê-Birayî ya Zurîh-Amed averşîyayîşê herêmî neql kerd.

 

Heyet, Hemsereka Meclîsê Cinîyan Emîne Omer, Verfeka Meclîsê Cinîyan ê Sûrîye Muna El Yusif, Verfeka Cimeatê Cinîyan ê Zenûbiya Şehrezad El Casim, endama Koordînasyonê Kongra Star Jiyan Hisên û îdarekara Yewîya Cinîyan ê Suryanî Jorjêt Bersûm ra pê yeno. Delegasyonî derheqê rolê cinîyan, tecrubeyê xoserî û tehlukeyê sîyasî de ercnayîş kerd.

 

Têkoşîn dewam keno

 

Endamanê heyetî eşkera kerd ke hukmatê demkî yê ke 5 serran ra aver ameyo awankerdiş, huqûqê enternasyonalî de tu qebûlbîyayîşê ci çin o û dîyar kerd ke qanûnê bingehîn tena bi hukmatêk daîmî derbasdar o. Ame vatîş ke Ehmed El Şara hîrê ra yewê parlamentoyî goreyê îradeyê xo tayîn kerd, no bêhuqûqî yo.

 

Çareserî xoserî ya

 

Heyetî va ke sîstemê merkezî yê şarî yewbînan ard rî bi rî û dîyar kerd ke çareserî modelêk Sûriye ya adem-merkezî ya. Na zî ame vatiş: “Xoîdarekerdiş her herêmî, do heqê temamê şaran û cinîyan bikero binê asayîşî.”