AMED - Sektorê taybetî de mobîngê cinîyan ser her ke şino zêde beno. A., ke serran o sektorê taybetî de xebatîyaya, wina va: “Sebebê girewtişê karê cinîyan asayîşê teberî yê cinîyan ke zêde bala muşterîyanê camêrdan bianco. Yanî hîsêk wina virazîyeno ke ma sey hacetî şuxilnenê. Cinî sey hacetî yenê şuxilnayîş.”

 

Welat de sektorê taybetî de cinî rastê mobîngî yenê û derheqê nê de qet tedbîrî zî nînê girewtiş. Derheqê mobîngî de her roje gerre û gazincî est ê. Cinî na rewşe qebul nêkenê û veng danê ke sektorê taybetî de kontrol zêde bikerê.

 

Sektorê taybetî ke cinîyan sey hacet vînenê û mobîng kenê, sere de mexazeyê kozmetîkî, xişirî, fîrmayê wesayîtan, mexazeyê cil û belgan, kafe û sewbînî yê bînî.

 

A., ke sektorê taybetî de xebatîyena, sebebê asayîşî ra nameyê xo û dîmenê xo nêda û çîyê ke cuya xo de ciwîyaya ajansê ma rê qal kerd.

 

‘Mobîng resayo sewîyeya tacîzî’

 

A. dîyar kerd ke sektorê taybetî bi xo mobîng o û va: “Zordarîyê girdî est ê. Nê zordarî hem di mexazeyanê franchîse (îmtîyaz) de hem zî yê sazîyan de est ê. Tewr asanî, eger ti boydayîşî rê zî vejîyê, vatişan vanê. Rewşêka lezgîn de, eger ti baş nêbê zî, to mexaze de vindarnenê. Bêguman lazim o ewnîyayîşê şexsî de baldarî bibo. Ma cinî xeylê binpaykerdişan dir yenê rî bi rî. Tewr zaf midûrê camêrd ê mexazeyan mobîng kenê. No êdî resayo tacîz. Wexto ke ti rî nêdî zî, tehdîdê ‘ma to kar ra erzenê’ kenê.”

 

‘Bêsebeb kar ra vejenê’

 

A. dewam de wina va ke sektorê mexazeyan de serrêk yan di serrî ked bêro dayîş zî semedo ke kes berz nêbo notê kêmî yê performansî danê û wina va: “Sektoranê taybetî de camêrdî rehet ê. Camêrdî çi wazenê kenê. Çîyêk qij de vanê ma karêk bîn vînenê û kewenê teber. Labelê cinîyan de wina nîyo. Cinî hende kede danê, midûrê mexazeyan bêsebeb cinîyan kar ra vejenê. Vanê ‘lazim o şima makyaj bikerê, xo rê biewnê’. Wexto ke ma porê xo normal kom bikerê zî hişyar kenê. No zî zaf tesîrê merdimî keno.”

 

‘Teberê 5 deqeyan de merdimî nêşkenê ronişê’

 

A. dîyar kerd ke sektorê mexazeyan de bi taybetî cinî xebatîyenê û wina dewam kerd: “Sebebê girewtişê karê cinîyan eysayîşê teberî yê cinîyan ke zêde bala muşterîyanê camêrdan bianco. Yanî hîsêk wina virazîyeno ke ma sey hacetî şuxilnenê. No semedê cinîyan tesîrêk pozîtîf nîyo. Cinî sey obje yena şuxilnayîş. Vanê ‘wina qisey bikerê, wina bikerê, destê xo wina bikerê, milê xo wina bikerê, ti nêeşkena pişta xo bidê cayêk. Şima nêeşkenê mîyanê xo de qisey bikerê.’ Eger kes çin o zî merdimî nêeşkenê rûşê. Bi saetan ma ser lingan de yê. 5 deqe tena ti eşkena rûşê, teberê nê de reaksîyon mojnenê.”

 

A. peynîya qiseykerdişê xo de wina veng da: “Ez cinîyanê ke rastê mobîngî ameyî rê veng dana. Cayo ke şima xo keyfweş hîs nêkenê, yan zî şima xo sey yenê şuxilnayîş hîs kenê, mevinderê. Midûr bo, selahîyetdar bo, kam beno wa bibo, nê mobîngî her tim bîyarê ziwan. Ez veng dana selahîyetdaran zî wa sey muşterî şêrê mexazeyan û bivînê ke xebatkaran rê senî nêzdî benê. Wa kontrol bikerê.”