AMED - Merkezê Piştdayîş û Cuye yê Cinan ê Nûjîn, ke serra 2017ine de Bismil de hetê qeyûmî ra ameybî padayîş, reyna ame akerdiş.

 

Merkezê Cuye û Piştdayîşê Cinan ê Nûjîn, ke serra 2017ine de qezaya Bismilî ya Amedî de hetê qeyûmî ra ameybî padayîş, hetê Şaredarîya Bismilî ra reyna ame akerdiş. Merasîmê akerdişî taxa Kurtuluş de kerdî û Hemsereka Şaredarîya Bajarê Girdî ya Amedî Sera Bucak, Hemsereka Şaredarîya Bismilî Mizgîn Ekin, Hemsereka Qezaya Bismilî ya DEM Partî Halîse Deyar Erkek, temsîlkarê Têgêrayîşê Cinîyan ê Azadan (TJA) û xeylê temsîlkarê sazgeh û rêxistinan cinan tewr bîyî.

 

Koordînatora merkezî Zehra Yuksekbag akerdiş de qal kerd û sipasîya beşdaroxan kerd û dîyar kerd ke Nûjîn bi hêvîya cuyêka neweyî ameyo viraştiş û cinîyan na îddîa ser o ard têhet.

 

Hemsereka Şaredarîya Bismilî Mizgîn Ekin ke peynî de qal kerd, dîyar kerd merkezê neweyî ke akerdê, îradeya cinan eşkera kerdo û va cinî do bibê merkezê têkoşînî.

 

Hemsereka Qezaya Bismilî ya DEM Partî Halîse Deyar Erkek zî qalkerdişê xo yê akerdişî de muhîmîyê merkezî dîyar kerd. A va lazim o hûmara merkezanê wina zêde bibo ke cinî eşkenê ci de xo rêxistin bikerê û sipasîya her kesî ke tewr bîyî kerd.