MERKEZÊ XEBERAN – 7 partîyê sîyasî yê Rojhelatê Kurdistanî ke belgeyê helwestê hempar îmza kerdbî, semedê tewrbîyayîşê xurt ê venga înan ê semedê grevî, sipasîya şarî kerd.

 

Hewt partîyê kurdî yê Rojhelatê Kurdistanî, semedê polîtîkayêka hempar a çalakîyanê protestoyî yê Îranî de, 6ê çeleyî de “Merkezê Hemkarî û Vajorî yê Partîyan” awan kerd û belgeyê helwestê hempar mohr kerd. Merkezî, derheqê protestoyanê Îran û Rojhelatî de eşkerayîye da. Eşkerayîye de semedê tewrbîyayîşa girdî yê qerarê grevê pêroyî yê partîyan, sipasîya şarî ame kerdiş. Eşkerayîye de wina ame vatene: “Bi grevan û protestoyê ke dewam kenê mesajêk xurt yê sîyasî dayî hêzê zextker û rejîmê îqtîdarî.”

 

Bi domdarî ame vatene ke tewrbîyayîşê girdî yê  qerarê grevê pêroyî nîşaneyê bawerîya şarî bi partîyê kurdan o û wina dewam kerd: “Îspat kerdî ke têgêrayîşa ‘Jin, Jîyan, Azadî’ dewam keno û kokê xo veradayê mîyanê cimatî. Têgêrayîş qerardar o ke çerxê Komara Îslamî reyke û heta peynî orte ra wedarno. Mojna ke polîtîkayê zextî nêeşkenê qerardarîyê şarê Kurdistanî yê cesaret û azadîwaz qels bikero. Şarê Kurdistanî û partîyê sîyasî bi yewbîyayîş û piştîdayîşê xo newe ra mojnayî ke têgêrayîşê înan ê rayîrê azadîye de derbasê qonaxêko newe bîyo.”