MERKEZÊ XEBERAN- Heyva Sor a Kurd seba Heleb de vindarnayîşê hêrişanê sîvîlan ser o û akerdişê korîdorê merdimîye yo ewle vengdayîş kerd û seba dermankerdişê birîndaran konvoyêkê weşîye ke 25 erebeyan ra yeno pê, erşawit herême.

 

Hêriş û qirkerdişanê çeteyanê hukmatê demkî yê Şamî yê vera taxanê Şêxmeqsûdi Eşrefîye û Benî Zêd ê Helebî de xeylê kesan cuya xo vîndî kerd û hûmarêka gird zî birîndar bîyê. Heyva Sor a Kurd derheqê babete de eşkerayî daye.

 

Eşkerayî vernîya awanîya Heyva Sor a Kurd a şaristanê Hesekê de ameye dayene. Hemserekê Heyva Sor a Kurd a Herêma Vakur û Rojhelatê Sûrîye Hedîye Abdullah û Dilgeş Îsa eşkerayî wende.

 

Eşkerayî de ame vatene ke riyê hedefgirewtişê keyeyanê sîvîl û sazgehanê bingeyîn ê xizmetî, rewşa taxanê ke 5 aşmî ra zafêr o ke dorpêçkerde yê, tehlukeyin o, bi taybetî lazimtîyê bingeyîn bi taybetî nêweşxane û merkezanê weşîye de nêmendê. Eşkerayî de ame dîyarkerdene ke grûbê hêrişkarî heta nika nêverdayo ke doktorî seba hetkarîya merdimîye û hewanayîşê birîndaran vîyarê taxan, hêrişî dewam kenê û wina ame vatene: “No binpaykerdişê heqanê merdiman û qanûnanê mîyanneteweyî yo.”

 

Heyva Sor a Kurd peynîya eşkerayîya xo de vengda heme hetanê mîyanneteweyî û herême yê eleqedar ke berpirsîyarîyanê xo yê exlaqî û merdimî bîyarê ca, seba vindarnayîşê hêrişanê vera sîvîlan bikewê têgêrî, korîdoranê merdimîye yê ewle akerê. Sewbîna ame vatene ke eke korîdorê merdimî bêrê akerdeen, ê amade yê ke vîyarê taxan ke birîndaran hewanê û hetkarîya merdimîye bidê.

 

Dimayê wendişê eşkerayî, Heyva Sor a Kurd bi 15 kamyonanê hetkarîye ver bi Helebî rayîr kewt.