Neslîhan Kardaş-Rojda Aydin

 

MÊRDÎN – Waya Ferhat Kûrtay, Rabîa Kûrtay derheqê prosesî û hêrişê Rojawanî ser de eşkera kerd ke qirkerdişê tarîxî de ameyê kerdiş xo vîr ra nêkenê û derheqê hêrişê Rojawanî ser o va: “Dewletê mîyanneteweyî çira bêveng ê?”

 

Hema vîrardişê serranê ke tariya Zindanê Amedî de derbas bîyê hema vîrê merdiman de bo zî, Tirkîya çekûya “Aştîye” ancî yenê vatene. Semedê keyeyê Ferhat Kûrtay, yew ê kesê ke uca tepişte bîyo, na çekûye tenya babeta munaqeşeyê sîyasî nîya; no nameyê dej, xoverdayîş û rîbirîbîyayîşêk nêqedîyayîşî yo. Her çiqas munaqeşeyê prosesî ewro dewam kenê zî, hêrişê Rojawanî ser o eynî vîrardişî gane keno; no yew çî ano vîrê merdim ke her vatişêk aştîye yê bê rîbirîbîyayîşê vîyarte dir çiqas xesas a.

 

Waya Ferhat Kûrtay, Rabîa Kûrtay derheqê prosesî de ajansê ma rê qisey kerd.

 

‘Şarê kurdî bedelê girdî dayî’

 

Rabîa Kûrtay ard ziwan ke tarîx ra heta ewro şarê kurdî bedelê zaf girdî dayî û va: “Ma kesî ra tu destûr nêwazenê. Ma dewaya nasname, ziwan û kulturê xo kenê. Tu sûcê ma çin o, ma tenya kurd ê. Ma kurd ameyê dinya û ma do kurd bimirê. Ewro zaf mezhebî mîyanê ma de est ê û ma heme yew ê. Ma vanê wa tenya yewîye bibo. Ma vanê wa heme mezhebî pîya cuyayîşêk bidominê. Heqê kesî çin o hêrişê ma bikero. Ma do bi nasnameyê xo yê kurdîtî heta peynî rayîr ra şêrê. Ê vajê yan nêvajê, serkewtiş ê şarê kurdî yo.”

 

‘Xoverdayîşê Zindanê Amedî her cayî vila bîyo’

 

Rabîa Kûrtay bale ant ser Zindanê Amedî ke tarîxî de cayêk muhîm est o û wina wa: “Înan vat ma do Zindana Amedî biqedênê. Esat Oktay çîyê nînê vatene û nînê kerdiş Zindanê Amedî de ard sereyê ma. Esat Oktay vatêne, ‘Heta yew kurd tîya bimano ez do tîya bî.’ Labelê nê merdimê Zindanê Amedî de xo fedayê şarê kurdî û Kurdistanî kerdî. Labelê Esat Oktay ra vatî ‘do Hayrî Dûrmûş silamê ma to rê bîyaro’ û silam ey rê şî. Ê vajê yan nêvajê kurdî îradeyê xo ra tênêgêrenê. Xoverdayîşê Zindanê Amedî her cayî de vila bîyo.”

 

‘Qirkerdişê ameyê kerdiş xo vîr ra nêkenê’

 

Rabîa Kûrtay da zanayîş ke pêwa ke prosesê aştîye dest pêkerd zî hema bi hezaran tepişteyê sîyasî zîndanan de yenê tepiştiş û wina dewam kerd: “Ewro bi hezaran tepişteyê sîyasî zîndanan de yenê tepiştiş. Labelê çira kesê ke tecawizê cinî û tutan kenê, kesê cinîyan qetil kenê nînê tepiştiş. Her efû kesê wina rê vejîyeno, labelê çira tepişteyanê sîyasîyan rê zî nêvejêno. Ez bawer kena ke na aştîye zî do bêra awankerdiş û nê çîyê ke ez vana orte ra bêrê wedaritiş. Ma sey şarê kurdî tu wext yewbînan ra nêvîsyenê. Ma ne ewro û ne zî vizêrî ra est ê, ma roja ke dinya ameya awankerdiş ra tepîya est ê. Labelê tirkî çin bî. Ewro ameyî zilm ma kurdan ser o kenê. No zîhnîyetê Helebce û Roboskî zaf qirkerdişî bica ard. Ê do senîn hesabê nê bidê. Ma tu wext nê qirkerdişê ameyê kerdiş xo vîr ra nêkenê.”

 

‘Dewletê mîyanneteweyî çira bêveng ê?’

 

Rabîa Kûrtay peynîya qiseykerdişê xo de wina va: “Ewro hêrişê Rojawanî kenê. Demo ke ez nê hêrişan vînena zerrîya mi dejena. Senîn wîcdanê înan rehet o? Heme dinya no wehşet çira nêvîneno? Huqûqnasan ra bigîre heta beşê bînî ganî heme kesî wurzê lingan ser o. Ê merdimî çi kerdî ke ewro hêrişê înan kenê? Ê tenya kurd ê. Fek nê hêrişan ra verabidê. Çimê xo veradayê herre û heme destkewtişanê ma ser. Ma çim nêverdenê herra înan, ê çira çim veradanê herra ma. Ewro HTŞ û DAIŞ hêrişê Rojawanî kenê. Labelê Tirkîya piştîdayîşê nê hêrişî kena. Ê nêwazenê aştî bêro caardiş û nê semedî ra hêrişê Rojawanî kenê. Ma kurdî bi taybetî ganî bibê yew. Pêwa emrê xo zî ez do tu wext bêveng nêmanî û linganê xo ser bimanî. Ez bawer kena ke ma reyke bîn bi ser kewenê. Biciwîyo kurd û Kurdistan.”