WAN - Wan de cinîyê ke koyan de pincar arê danê, hem keda xo ya ke nîna vînayîş, hem zî zanayîşê nebatanê bi şîfa danê ciwîyayîş. Cinîyê ke cuya xo mîyanê xozayî de vîyarnenê, dîyar kerdî ke arêdayîşê pincarî sey debarî vînenê.

 

Keda cinîyan sey her wareyî, tîtikê koyan de zî nîna vînayîş. Cinîyê ke kar û baranê keyeyî de kedêka pîle danê, pêwa nê wareyê ekonomî û cimatî de cayê ke heq kenê nêvînenê. Bi xususî dewan de rolê cinîyan ê ke kedêka pîle danê nîna vînayîş.

 

Westanê Wanî de, dewa Îrîçî de cinîyê ke sibayî ra rew wurzenê, seba arêdayîşê pincarî kewenê rayîr. Cinîyê ke wextêk bi wesayîtan şonê, xo resnenê wareyê ke pincar tede vecîyayo. Dimayê ci bi saetan pincarî arê danê. Tûrikanê xo pirrî pincarê bi şîfa kenê.

 

Kêfweşîya ke dimayê roje de yena hîskerdene

 

Cinîyê ke ver bi şanî bi pincaranê xo agêrenê, pêwa rincanbîyayîşî bi paştîdayîşî û hêzê berardeyê ke kerdî, agêrenê keyeyanê xo. Keda cinîyan tîya de nêqedîyena; pincarê ke arê danê, keye de pak kenê û amade kenê. Cinîyî tenê nê şîfayî nêanê serê sifreyan, nê nebatan sey çimeyê şîfayî vînenê û wuşk kenê.

 

Cinîyê ke tûrikê pincarî serê milanê xo de tîtikê koyan ra kerdî war, seranserê rayîrî şîfa û muhîmîyê nê nebatan zî qal kerdî.

 

‘Ma bi xozaye dir yew ê’

 

Cînîya bi nameyê Şadiye Akti da zanayene ke keda cinîyan nîna vînayîş û cinîyî pêwa heme zehmetîyan serê lingan de yê. Şadiye Akti dîyar kerd ke cinî, cuye û xoza yew ê û wina va: “Cinîyî her wareyî de debara xo kenê. Keda cinîyan yena binpaykerdene. Ma bi xozayî dir yew ê. Hîn pincarî benê werd. Hîn zî ma sey şîfa şixulnenê. Ma Çohrîne werdanê xo de şixulnenê. Bi şîfa ya. Ma pincarê Karî zî sey pelanê sarmeyan şixulnenê. Seba nêweşîyan zî şîfa ya. Gûhbizin kewena her werdî. Seba birînan baş a.”

 

‘Do koyan, xoza û nebatan xo vîrî ra bikerê’

 

Kewê Işik zî da zanayene ke neslê dimayê înan do nê nebatanê bi şîfa xo vîrî ra bikerê û wina dewam kerd: “Ê ke dimayê ma de yê, do nê nebatan nêzanê. Do erjê nebat, xoza û koyan xo vîrî ra bikerê. Pincarê Banreş her werdî de yeno şixulnayene. Bi şîfa yo. Ma wina debare kenê. Cinîyî çin bê, cuye çin a.”