Nazlican Nûjîn Yildiz

 

ÎZMÎR - Hanse Bulut va ke heta azadîya fîzîkî ya Rayberê Şarê Kurdî Abdullah Ocalan pê nêbêro aştî mumkin nîya û wina va: “Aştî destê serekê ma de ya. Eke serekê ma azad bibo ma do heme rehet bikerê. Do tirkî zî rehet bikerê.”

 

Prosesê “Aştî û Cimatê Demokratîkî” ke bi vengê Rayberê Şarê Kurdî Abdullah Ocalanî dest pêkerd no yew serrî ra zêde yo dewam keno. Prosesî de gamê muhîmî ameyî eştiş la hema dewlete gamêk somutî nêeşta. Şarê Kurdistanî, Tirkîya û Rojhelatê Mîyanênî hemverê nê de reaksîyon nîşan danê. Şarê kurdî yê ke dest waştişanê xo ra nêverdayo, dîyar keno ke aştî girêdayeyê azadîya fîzîkî ya Rayberê Şarê Kurdî Abdullah Ocalanî ya.

 

Şarê kurdî pêwa heme zordarî, qirkerdiş û înkarî têkoşînê xo domnenê û aştîye pawenê. Hanse Bulut a ke Nisêbînî ra ya û koçê Îzmîrî kerda, derheqê zor û zehmetîyanê ke antê û aştîye de qisey kerd.

 

Koçberî û zor û zehmetîyê ke ameyê ciwîyayîş

 

Hanse Bulut va ke serra ke Abdullah Ocalan bi komployê mîyanneteweyî ame Tirkîya aye Nisêbînî ra koçê Îzmîrî kerda û va: “Her roje yew vernîya çimanê ma de ame qetilkerdiş. Semedê zor û zehmetî, zordarîyan ma koç kerd. Ma ameyî Îzmîr dimayê demêk şîyî Stenbol. Ma 9 serrî uca de mendî. Prosesê îdarekardişanê xoserî de ma agêrayî Nisêbîn. Di aşman de kes uca nêmend. Şehadetî zêde bî. Mi nêwaşt uca ra bivejîyî. Ameya destbendkerdiş. Di rojî binê çiman de menda. Lajê mi ame tepiştiş. Ez bi zorî Nisêbîn ra  ameya vetiş. Wexto ke ameya destbendkerdiş vatî ‘kutika PKKyî’. Dima ra vatî hetkarîya rêxistine kena. Ceza dayî mi û ez ameya tepiştiş.”

 

‘Ma zaf dejî antî’

 

Hanse Bulut wina ard ziwan: “Dima ke ameya tepiştiş waştî mi berê qawişa edlîyan. Mi va ez şina koridorê sîyasîyan. Mi qebul nêkerd. Vatî ma do ceza bidê to mi va bidê. Hewl dayî cigêrayîşê viran bikerê. Mi qebul nêkerd. O proses wina vîyart. Di serrî tepişte menda. Demê tehlîye ez veta dadgehe. Tehlîyeyê mi hîrê aşman ame dergkerdiş. Semedo ke mi nêva ez poşman a tehlîye ame dergkerdîş.”

 

‘Ma aştîyêka bêserekî nêwazenê’

 

Hanse Bulut derheqê prosesê aştî û cimatê demokratîkî û vengê Rayberê Şarê Kurdî Abdullah Ocalanî de zî wina ard ziwan: “Ma azadîya fîzîkî ya Abdullah Ocalanî wazenê. Ma aştîyêka bêserekîya xo qebul nêkenê. Serekîye zaf game eşt. Çekî ameyî veşnayîş. La hukmatî tu çîyêk nêkerd. Nêweşê tepişteyî zîndanan de terkê merdişî yenê kerdiş. Sîyasetmedarê ma hema tepişte yê. Kurdî sey verê nîyê. Ma teslîm nêbenê. Ganî nêweşê tepişteyî bêrê veradayîş. Ma her wext aştî waşt. Ma şer nêwazenê. Aştî destê serekîya ma de ya. Eke serekîya ma azad bibo ma do heme azad bibê.”