ANQARA - Bedia Ozgokçe ke semedê Rayberê PKKyî Abdullah Ocalanî bi CTPyî rê pêvînayîş kerd û mîyanê heyetê HDPyî de ca girewtêne vat: "Tena ma cewabê, ma pêvînayîş bi 4 kesê ke girawe de yê kerdo, girewt."

 

Tecrîdê giran yê serê Rayberê PKKyî Abdullah Ocalanî de dewam keno û semedê peynîbîyayîşê tecrîdî çalakî û vengdayîş dewam keno. Semedo ke xebere Abdullah Ocalanî ra nêno girewtiş, qesawet zî zêde beno. Heto bîn ra zî welatê cîya de avûkatan waşt ke şêrê  Îmraliyî la hema cewabêkê nêameyo girewtiş. Pêwa nê zî 12ê teşrîna verêne de Vervatoxa Komîsyonê Karê Teberî ya Partîya Demokratîke ya Şaran (HDP) Feleknas Uca û Hişyar Ozsoy, Temsîlkarê Konseyê Ewropa yê HDPyî Faîk Yagizay û hemşaredara Bajarê Girdî ya Wanî Bedîa Ozgoke Ertan ke qeyûm tayînê vera ci bi, bi Komîteyê Vernîgirewtişê Îşkencî yê Ewropa (CPT) dir pêvînayîş kerdî. Heyetê HDPyî bi Sektereterê Pêroyî yê Regîs Brîllat û selahîyetdarê Masaya Tirkîye ya CPT Elvîn Alîyev reyde ameyî têhet.

 

Bedîa Ozgokçe Ertan, derheqê pêvînayîşî de ajansê ma rê qisey kerd.  

 

‘Ma Birêz Ocalanî nêeşkenê sey kesêkê bigîrê dest'

 

Bedîaye da zanayîş ke 24 serrî yo Raberê PKKyî Abdullah Ocalan binê tecrîdî de yeno tepiştiş û vat: "Tu cayê dinya de terzêkê tecrîdî yê wina çin o. No tecrîd hemverê mevzuatê zerî û mîyannetewî yo. No dewamê qerarêkê polîtîk ê 24 serrî dewam keno yo. 18 aşmî yo nêeşkeno bi keye û avûkatanê xo dir pêvînayîş bikero. No bi qanûnî nêeşkeno bêro vatiş. Semedo ke tu qanûnî de çîyêk wina çin o. Yê ke  nê qerarî gênê zî polîtîk têgêrenê. Birêz Ocalan tena kesêk nêyo. Rayberê şarêkê yo. Bi mîlyonêk kesî vanê îradeyê ma yo. Semedê nê ma Birêz Ocalanî tena nêgîrê dest. Tecrîd, îzolasyon û kaos girêdayê problemê Kurdî yo.”

 

‘Tecrîd tesîr serê qanûnî zî kerd'

 

Bedîa dîyar kerd ke 19 aşmî yo xebere Abdullah Ocalanî ra çin a û wina vat: “Gelo se beno? Gelo se kenê? Fehmê nêçareserî 24 serrî yo dewam keno. Ma her platform, kombîyayîş, eşkerayîye û pêvînayîşan de tecrîd anê rojeve û muxatab û derûdoran de cipersayîş kenê û wazenê na babete de cewabêkê bigîrê. Reyna çalakî, bername, protesto û nobete yenê girewtiş. Strasburgî de çalakîya çadire esta. Nobete yena girewtiş. No hemverê tecrîdî yeno girewtiş. Na babete her tim rojeve de gênê. La tecrîd grawe ra ameyo vetiş û serê heme hetan ser zîndanan de bi ca yeno. Tecrîd êdî tesîr serê qanûnan de zî kerdo."

 

‘Ganî CPT rewşa zîndanan cigêrayîş bikero'

 

Bedîa bale ant serê CPT û vat: “Raporê CPT amade keno, hetê rewşa zîndanan û karneya heqê merdiman de xeylêk girîng o. CPT ganî rewşa zîndanan cigêrayîş bikero, raporan amade bikero û binpaykerdişan bi welatan bidê vîrkerdiş. Raporê ke hetê CPT ra yenê amadekerdiş, semedê welatan seke dersêke yo. CPT komîteyê ke ganî derheqê binpaykerdişê heqan de Komîteyê Wezîran gerre bikero yo. CPT ganî wezîfeyê xo yê rutîn bikero, rewşê lezgîn de zî şert û mercan ca de cigêrayîş bikero û rapor amade bikero."

 

Bi Abdullah Ocalan û hîrê tepişteyan dir pêvînayîş ameyo kerdiş

 

Bedîa dîyar kerd ke CPT nêzdî ra zîndanê Îmraliyî taqîb keno û vat: “Aşkerenêkerdişî raporan bi pêroyî binê tekelê Tirkîya de yo. 2016ine ra dima Îmraliyî ra rapor eşkera nêkerdê. Serdayîşê 2018ine de zî zîyaret kerdî ka rapor nêame eşkerakerdiş. 2021î de zî serdayîş ame kerdiş. Demêk nêzdî de zî zîyaret kerdê la no zîyaret ajandê înan de çin bi."

 

'Bi cewabê kilm persî derbaz kerdî'

 

Bedîa dewam de wina vat: “Heyetê  Ocalanî ra Azadî estbi. Ma sey heyetî endîşeyê xo ardî ziwan. Ma xeberanê derheqê prosesê polîtîk de ard ziwan. Ma nêzdîbîyayîşê Tirkîya yê hemverê tepişteyê sîyasî û tepişteyê nêweşî ard ziwan. Ma qesawetê xo ard ziwan. CPT nêzdîbîyayîşêk goreyê wezîfeyê xo nîşan da. Pêvînayîşê ma manayîn dîyî. Ma rewşa Birêz Ocalanî û tepişteyê bînan pers kerd. Ma vat, wina dewam bikero do rayîr verê krîzî abibo. Înan zî cewab da: ‘Ma bi çar kesê ke girawe de yê yew bi yew pêvînayîş kerd.' Bi cewabê kilm persî derbaz kerdî. Cewabê ke ma îqna bikerê nêame dayîş."

 

‘Helwestê polîtîkaya AKPyî bi zanebîyayîş yena kerdiş'

 

Bedîa tewr peyîn wina vat: “Têkoşînê şarî do bi CPTyî hemle bido eştiş. Qesawetê ma dewam kenê. Ganî qesawetê ma werte ra bêrê wedaritiş. Zîndanî neynika welatêkê yê. Wareyê ke tewr zêde qerarê polîtîkî verê çiman de yenê vînayîşî yê. Her çî ra dewlete berpirsîyar ra. Şexsê tepişteyê sîyasî de peymanê semedê şarê kurdî yenê dayîş, yenê vînayîş. Sebebê nêweşînayîşê raporê CTPyî netîceyê polîtîka bi zanebîyayîşê Tirkîyaye yo. Tirkîya qertê multecîyan baş şuxilnena."