NAVENDA NÛÇEYAN -Di çalakiya Şeva Çanda Kurd a li Cenevreyê de, ji bo azadiya Rêberê PKK'ê  Abdullah Ocalan peyam hatin dayîn.

 

Li bajarê Cenevre yê Swîsreyê çalakiya 13'emîn a Şeva Çanda Kurd hate lidarxistin. Serokê berê yê Şaredariya Cenevreyê Frédérique Perler ku endamtiya Konseya Şaredariyê didomîne û endama Konseya Şaredariyê Christina Kitsos diyar kirin ku divê tecrîda li ser Rêberê PKK'êAbdullah Ocalan bê rakirin.

 

Çalakî li salona Avanchet a girêdayî Şaredariya Verniere ya li kantona Cenevreyê, ji aliyê Komîsyona Çandê ya Navenda Civaka Kurd a Demokratîk a Cenevreyê (CDK-Ge) ve hate lidarxistin. Bi sedan Kurdistanî û Swîsreyî, gelek saziyên civakî yên sivîl û siyasetmedar tevlî çalakiyê bûn.

 

Çalakî ji bo bîranîna şehîdên şoreşê yên Kurdistan û cîhanê bi deqeyek rêzgirtinê destpê kir. Li ser navê CDK-Ge’yê Ramazan Baytar bi Fransî û Kurdî axivî û kesên beşdarî çalakiyê bûne silav kir. Nivîskar Yaqob Tilermenî têkildarî polîtîkayên asîmîlasyonê yên li ser çanda Kurd, dîroka hunerê û zimanê Kurdî axivî.

 

Her wiha têkildarî danasîna gundê Jinwar belgesel hate temaşekirin. Koma şanoyê ya zarokan jî derket ser dikê.

 

Ji aliyê Enstîtuya Kurd a Swîsreyê ve stand hate danîn û di çarçoveya kampanyaya “100 Hezar Qert” de qert hatin îmzekirin.

 

Divê Ocalan azad bibe

 

Li ser navê Şaredariya Cenevreyê Endamên Konseya Şaredariyê Frédérique Perler û Christina Kitsos axivîn. Perler û Kitsos diyar kirin ku ew ji bo nîşan bidin ku bi Kurdan re di nava piştevaniyê de ne, hatine vir û destnîşan kirin ku ew dixwazin îzolasyona li ser Abdullah Ocalan bi dawî bibe û Ocalan azad bibe.

 

Di merasîmê de banga tevlîbûna meşa ku wê 10’ê Sibatê bi pêşengiya enternasyonalîstan bê lidarxistin, hate kirin.

 

Helbestvan Dilber Hema jî di merasîmê de helbestek xwend. Hunermend Seyda Perînçek, Zarîfe Zerrîn, Kawa Delîl, Azad Karahan û Yilmaz Yikilmaz derketin ser dikê û merasîm heta saetên dereng dewam kir.