Rêwiyên Amarayê: Divê êdî Abdullah Ocalan azad bibe

2025-04-03 09:05:10


	 

	Melîke Aydin

	 

	
		ÎZMÎR - Jinên ku çûn Amarayê diyar kirin ku Rêberê Gelê Kurd Abdullah Ocalan bû sedem ku gelê kurd nasnameya xwe nas bike û jinan gotin ku divê êdî Abdullah Ocalan azad bibe.
	
		 


	Jin bi boneya 76’emîn rojbûna Rêberê Gelê Kurd Abdullah Ocalan dê li Îzmîrê li gundê Amara yê Navçeya Xalfetî ya Rihayê beşdarî çalakiyan bibin. Jinan diyar kirin ku Abdullah Ocalan ne tenê gelê Kurd bi xwe da naskirin, jinên Kurd li hemberî mêran jî xurt kir û gotin ku divê êdî Abdullah Ocalan azadiya xwe ya fîzîkî bi dest bixe. Jinan her wiha diyar kirin ku tenê Abdullah Ocalan dikare aştiyê pêk bîne.

	 

	'Divê êdî azadiya fizîkî bê misogerkirin'

	 

	Nihayet Keklîk diyar kir ku ew ji bo daxwaza azadî û aştiyê çûne Amarayê û herî dawî diyar kir ku di rojbûna Rêberê Gelê Kurd de divê Abdullah Oclan ji aliyê fîzîkî ve azad bibe. Di dawiyê de Nihayet Keklîk, anî ziman ku Abdullah Ocalan rêberê gelê kurd e û wiha got: "Zimanê me qedexe bû, me nedikarî em bêjin em kurd in. Me nasnameya xwe nas nedikir. Rêberê me pêşengiya me kir. Em li tu derê nehatin naskirin, Rêberê me alîkariya me kir ku em şiyar bibin."

	 

	'Tenê Abdullah Ocalan dikare aştiyê bîne'

	 

	Nihayet Keklîk diyar kir ku Serokê MHP'ê Devlet Bahçelî ji bo kongreya PKK'ê pêk bê bal kişandiye ser Melezgirtê û got, "Dibêjin Kurdan li vir derî ji Tirkan re vekirine. Lê belê li Zîlan û Dêrsimê komkujî pêk hatin. Heta jinên ducanî û zarokên nehatine dinê qetil kirin. Piştî van komkujiyên mezin, Rêberê me çavên me vekir. Tenê Abdullah Ocalan dikare aştiyê bîne. "

	 

	'Jina Kurd li hemberî mêran xurt kir'

	 

	Leyla Tufan diyar kir ku tecrîd hîna dewam dike û divê êdî Rêberê Gelê Kurd Abdullah Ocalan serbest bê berdan û got, "Em dixwazin di rojbûna xwe de serbest bê berdan. Eger ew nebûya, em ê weke jin ji aliyê mêran ve her bi zilm û zordariyê rû bi rû bimana. Mêran wê binpêkirina mafên me bidomandana. Lewma em deyndarê wî ne."

	 

	
		'Divê hemû girtiyên siyasî bên berdan'
	
		 


	Leyla Tufan diyar kir ku girtîgeh tijî zarokên gelê kurd in û divê hemû girtiyên siyasî di serî de Abdullah Ocalan bên berdan.

	 

	'Ji bo azadiya hemû gelên cîhanê girtî ye'

	 

	Dayika Aştiyê Mûzeyyen Kortak diyar kir ku Rêberê Gelê Kurd 26 sal in di Girtîgeha Îmraliyê de girtî ye û got, "Em weke hemû gelê Kurd rojbûna wî pîroz dikin. Weke Dayikên Aştiyê em di nava hewa germ û sar de kolan bi kolan dimeşin. Em aştiyeke bi rûmet dixwazin. Lê belê azadiya Rêberê me ne tenê ji bo gelê kurd e, ji bo hemû gelan e. Loma divê hemû dayik li berxwe bidin û ji bo aştiyê têbikoşin."