GABB'ê civîna meclisa xwe li dar xist 

2025-04-29 12:53:05


	 

	 

	AMED - GABB'ê komcivîna xwe li dar xist. Hevseroka GABB'ê Neslîhan Şedal diyar kir ku bi banga Rêberê Gelê Kurd hêviya aştiyê mezin bûye.

	 

	Yekitiya Şaredariyên Herêma Anatoliya Başûrê Rojhilat (GABB) li Çand Amed (Navenda Kongreyê ya Şaredariya Bajarê Mezin) a li navçeya Yenîşehîr a Amedê yekemîn Komcivîna xwe ya Asayî ya Salane li dar xist. Hevserokên GABB'ê Neslîhan Şedal û Sîraç Çelîk û hevşaredarên ku qeyûm tayînî şûna wan hatin kirin jî di nav de hemû hevşaredarên DEM Partiyê tev li komcivînê bûn.

	 

	‘Hewceye em mil bidin hev û vê pêvajoyê xurt bikin’

	 

	Komcivîn bi axaftina Hevşaredarê Rezana Amedê Sîraç Çelîk dest pê kir. Sîraç Çelîk diyar kir ku dema piştî hilbijartina 31ê Adarê ketin şaredariyan dîtin ku gelek kêmasî hene û wiha got: “Tevahî şaredariyên me hatibûn valakirin. Ji aliyê aboriyê ve gelek kêmasî hebûn. Derfet jî tune bû lê em e kêmasiyan ji holê rakin. Ji bo şaredarên me karê xwe bikin em ê di nav xebatan de bin. Em bawer in em qels namînin. Di 27ê Sibatê de birêz Abdullah Ocalan ji bo aştiyê bang kir. Hewceye em mil bidin hev vê pêvajoyê xurt bikin. Ji aliyê aboriyê ve em ê xwe xurt bikin. Em ê mil bidin milê hevdû vê pêvajoyê xurt bikin. Ji ber ku em berpirsiyar in.”

	 

	Piştî axaftina Sîraç Çelîk ji bo hevserokatiya GABB'ê hilbijartin hate kirin. Di hilbijartinê de Neslîhan Şedal dîsa weke Hevseroka GABB'ê hate hilbijartin.

	 

	‘Di şexsê hevşaredaran de qeyûm tayînî vîna gel hatkirin’

	 

	Piştre Neslîhan Şedal axivî. Neslîhan Şedal diyar kir ku wan saleke zehmet derbas kiriye û wiha got: “Desthilat ji bo em ne xebitin astengî derxistin pêşiya me. Lê hevalên me ew astengî derbas kirin û karê xwe mezin kirin. Ez li vir hevşarên ku qeyûm tayînî şûna wan hatine kirin silav dikim. Di şexsê hevşaredaran de qeyûm tayînî vîna gel hat kirin. Em ê her dem li ber xwe bidin. Bi destê darazê tê xwestin ku vîna gel were binpêkirin. Lê em tu carî nahelin vîna gel bin pê bikin. Em bi GABBê li dijî van politîkayan têdikoşin. Piştî banga Rêberê Gelê Kurd Abdullah Ocalan em behsa aştiyê dikin. Hêviya me mezin bû. Em tevahî şaredarên me ji bo aştiyê li vir in. Li vê ednigariyê jin tên kuştin. Li ser axa me ciwan dixwazin ku koçî cihên din bikin. Ji bo bajarên me demokratîk û ekolojîk bibin em ê têbikoşin.”

	 

	Komcivînê bi hilbijartina encumenan berdewam kir.