Cinîya ke xîret kerdî qetil bikerê travma serê xo ra nêeşta! 

2024-03-25 11:22:45


	 

	 

	Zelal Tunç

	 

	WAN - Rojanê verênan de cinîya bi nameyê Z.Ş.ye hetê camêrdo ke aye reyde merheleya fek verdayîşî de bî xîret ame kerdiş ke bêra qetilkerdiş û bi giranî birîndar bî. Aktîvîsta TJAye Zeynep Kayaya ke şî nêweşxane Z.Ş.ye zîyaret kerd dîyar kerd ke qewimîyayîş verê çimanê tutanê aye de qewimîyayo û rewşa cinîye û keyeyê aye xeylê xeraba. 

	 

	Rojanê verênan de Wan de Raşteyê Îskeleyî de cinîya bi nameyê Z.Ş.ye hetê camêrdo ke aye reyde merheleya fek verdayîşî de bî, xîret ame kerdiş ke bêra qetilkerdiş. Bi mudaxaleyê kesê dorme Z.Ş.ye xelesîya bî. Şikdar ame destbendkerdiş la malumatê nasnameyê ci ameyî nimitiş. Z.Ş.ya ke xeylê cayê bedene xo ra birîndar bî wedarîyaye beşê ciewnayîşê giran ê nêweşxaneyî. Ame zanayîş ke Z.ye hertim şîdetê sîstematîk dîya û bi kiştişî reyde ameya tehdîtkerdiş. Şikdar roja qewimîyayîşî ame destbendkerdiş û hetê mehkema ra ame tepiştiş. 

	 

	Aktîvîsta TJAye şî zîyaretê Z.Ş.ye 

	 

	Aktîvîsta Têgêrayîşê Cinîyê Azade (TJA) Zeynep Kayaye nêweşxane de dima ke Z.Ş.ye zîyaret kerd ajansê ma rê qisey kerd û vat: “Şikdar polîtîkayê bêcezaverdayîşîra hêz girewto. Yew qirik, 10 darbeyê kardî Zye visto. Dima ra Zye wedarnenê beşê ciewnayîşê giran ê nêweşxaneyî. Ma xîret kerd ke Zye bivînê û tewr peynî ma şîyî zîyaretê aye. Hetê psîkolojîk de rewşa aye qet baş nîya. Rewşa keyeyê aye zî xirabo. Qewimîyayîş verê çimanê tutan de pê ameyo. Psîkolojîyê tutan zî baş nîyo.” 

	 

	‘Şikdar û kiştox yewbînan ra cesaret gênê’ 

	 

	Zeynepe qiseykerdişê xo wina dewam kerd: “Şikdar û kiştox polîtîkayê bêcezaverdayîşîra cesaret gênê. Wexto ke vejîyenê vernîya dozger û mehkema kravatan kenê qirikê xo û rewşa baş ra ceza seba înan yena kêmkerdiş. Qanûnê ke îqtîdar veto mexdûran nêpawenê. Heme dinya şahidê nê yo. Qanûn raşte raşt camêrdan pawenê. Ma venga heme dezgehan û her kesî kenê ke kişta cinîyan de ca bigîrê.”

	 

	‘Ganî ma têkoşîn rayîr ra berê’ 

	 

	Zeynepe qiseykerdişê xo yê peyênan de ard ziwan ke kiştişê cinîyan her ke şino zêde beno û nê ercnayîşan kerd: “Ma fek têkoşînî ra vera nêdanê. Her roje cinî yena qetilkerdiş. Ganî ma vera nê de têkoşîn bikerê. Ma heme cinîyan û dezgehan ra paştîdayîş pawenê. Ganî kiştoxî ceza bigîrê û seba nê çi destê ma ra bêro ma do bikerê. Ma do pîya ser bikewê. Ma do vera nê de têkoşînê xo dewam bikerê. Ma zanê ke ma cinî, heqdar ê û ma do pîya ser bikewê.”