
‘Ma mexdûr ê la selahîyetdarî xo heqdar vejenê’

2024-10-29 11:06:44


	&nbsp;

	&nbsp;

	&nbsp;

	Derya Ren

	&nbsp;

	SEMSÛR - Mexdûra erdlerzê Hatîce Buluş, konteyner de ciwîyena û da zanayîş ke problemê psîkolojî û fizîkî ciwîyenê û vat: "Ma nêeşkenê çîyêk mutahîtî ra vajê, semedo ke endîşeyê gelo beno mutahît banê ma xirab virazno. Semedo ke şaredarî û Wezaretê Bajar û Derûdorî her tim xo heqdar vejenê, ma nêeşkenê çîyêk zî bikerê.”

	&nbsp;

	&nbsp;

	6ê Sibata 2023ine de Mereş de erdlerz virazîya û bajarê derûdorî zî ci ra tesîr bî. Bi deshezaran kesî dinyaya xo bedelnayî, bi sehezaran birîndar bîyî û bi mîlyonan awanî wêran bî. Nînan ra yew zî bajarê Semsûrî yo. Hetê serekkomarî ra ame dîyarkerdiş ke do mîyanê serrêke de pêro problemî bêrê çareserkerdiş. La heta nika çîyêk verê çiman de çin o.&nbsp;

	&nbsp;

	Hatîce Buluş, merkezê bajarî de ciwîyena û erdlerzî de banê aye xeylêk xisar vîna. Hatîce nika zî konteyner de ciwîyena. Hatîceya ke banê xo çarçewaya vurnayîşê bajarî de teslîmê mutahîtan kerd, nika zî nêameyê viraştiş.&nbsp;

	&nbsp;

	Hatîce, derheqê babete de ajansê ma JINNEWSî rê qisey kerd.&nbsp;

	&nbsp;

	Hatîce, bale ant probleman ser û vat: "Bajarê konteynerî de xeylêk problemî est ê. Hetê psîkolojî û fizîkî de xeylêk problemê xidar ciwîyenê. Ma wazenê derbazê banê bi kîra bibê labelê xeylêk banî zirar dîyê û ma zî tersenê. Ma par mutahîtêk dir bazarê xo kerd, labelê bi sebebê cîya karê xo nêkerd û şaredarî zî rewşa bîyaye kena zehmet. Ma vînenê ke hîn kesî pey ma ra dest bi viraştişê banî kerdê û ha xilas kenê. Ma êdî nêwazenê konteyner de biciwîyê."

	&nbsp;

	Hatîce, dîyar kerd, kênaya aye amadekarîyê unîversîte kerdêne la semedo ke konteyner de bî nêeşka rindî bişuxilyo û vat: "Îmkanê ke dersanê xo virazno çin o. Zimistanî de ma berê xo padanê û no wext zerre zî bêhewa maneno û wexto ke ti ber abikerê zî zerre serdin beno.”

	&nbsp;

	Hatîce, tewr peyîn wina vat: "Ganî karê selahîyetdaran tenê serdayîşê konteyneran nêbo. Sûcê ma zî est o ke ma selahîyetdaran ra nêvanê, 'Bêrê rojêke sey ma biciwîyê' Tersê ma est o ke ma çîyêk şaş mutahîtan ra vajê. Semedo ke endîşe beno, gelo beno sebeb ke mutahît keyeyê ma xirab virazno? Kar mabêne şaredarî û Wezaretê Bajar û Derûdorî de yeno kerdiş. Gelo ez o şêrî vajî çi? Semedo ke timî xo heqdar vejenê."

	&nbsp;