Cinîyê Xelfetî: Hemserekê ma tena nîyê 

2024-11-05 10:13:38


	 

	Derya Ren

	 

	RIHA - Cinîyê Xelfetî dîyar kerdî ke ê do hemverê tayînkerdişê qeyûman xo ver bidê û vatî, "Ma do destûr nêdê qeyûman. Ma do her ware de xo ver bidê.”

	 

	Vizêr serê sibayî qeyûm tayînê Şaredarîya Bajarê Pîlî ya Mêrdînî, Êlih û Xelfetî yê Rihayî ke binê îdareyê Partîya Têduştî û Demokrasî (DEM Partî) de yê, qeyûm ame tayînkerdiş.

	 

	Cinîyê Xelfetî reaksîyon vera tayînkerdişê qeyûman mojnayî.

	 

	Desteserkerdişî îradeyî

	 

	Endama Meclîsê Şaredarîya Xelfetî Ayşe Yeşîltepe dîyar kerd ke ê do hemverê qeyûman xo ver bidê û vat: "Ma do polîtîkayê qeyûman qebûl nêkerê. Reya diyîne yo eynî çî kenê, verê zî kerdê. No desteserkerdişê îradeyî yo."

	 

	Mesajê xoverdayîşî

	 

	Hemsereka Qezaya Xelfetî ya DEM Partîye Aslihan Çîftçî zî wina vat: "Ma ser kewenê, bi zulm hewl danê ke destê ma ra bigîrê. Edalet çin o. Ma sindoqan ra vejîyayî û serkewtî. Çîyo ke ma heq kerdibî, ma girewt. Ma do heta peynî xo ver bidê. Ma nê zulmî tu wext qebûl nêkenê."

	 

	'Ma do destûr nêdê qeyûman'

	 

	Naîle Denîz dîyar kerd ke înan serê sibayî agahîya qeyûmî girewtê û vat: "Ma do destê hemşaredaranê xo vera nêdê. Ma do timî verê înan de bê. Eke lazim bikero ma do semedê heqê xo bimirê. Ma destûr nêdanê qeyûman. Ma do her ware de xo ver bidê.”

	 

	'Ma qebûl nêkenê'

	 

	Dursun Keskîn, dîyar kerd ke saetê sibayî de cayê cîyayê Xelfetî ameyî ablûqakerdiş û vat: "Ma do xo ver bidê. Ma her tim est bî û do bibê. Badê her weçînayîşî şaredarîyanê ma ma ra gênê. Ma qebûl nêkenê."