‘Ganî cinî hemverê şîdetî de rêxistinbîyayîş xurt bikerê’

2024-11-20 10:34:13


	 

	Mîdye Miqted

	 

	HELEB - Cinîyê Helebî dîyar kerdî ke şîdetê cinîyan ser o her ke şino zêde beno û vatî, ganî hemverê nê de cinî rêxistinbîyayîşê xo xurt bikerê.

	 

	Cinîyê Helebî bi munasebetê 25ê Teşrîna Peyêne Roja Têkoşînê Hemverê Şîdetî de dîyar kerdî ke ganî ê hemverê şîdetî de xo bipawê û vatî, bi felsefeya Jin jiyan azadî ê do têkoşînê hemverê şîdetî, xurt bikerê. 

	 

	Her roje şîdet cinîyan rê yeno kerdiş

	 

	Endama Merkezê Cigêrayîşê Jineolojî ya bajarê Helebî Leman Şêxo da zanayîş ke şîdetê cinîyan ser,  her tim dewam keno û wina vat: "Heta roja ma ya ewro her wareyê cuye de cinîyan rê her roje şîdet yeno kerdiş. Ganî ma tena 25ê Teşrîna Peyêne de şîdet nêdê ercnayîş. Her roje cinî şîdetî dir rî bi rî yê û bi taybetî bi destpêkerdişê alozîya Sûrîye şîdet cinîyan ser zêde bî.”

	 

	Ganî ma xo bipawê 

	 

	Leman Şêxo tewr peyîn wina vat: "Ganî cinî xo bi rêxistin bikerê, her ware de ca bigîrê ke bieşkê xo şîdetî ra bipawê. Ganî ma vengê xo berz bikerê û çimanê xo mepadê. Semedo ke ma bêveng bê do şîdet bibo rûtînêk û ma ser o bêro dewamkerdiş la oyo muhîm ganî ma bipawê û vengê xo ver bi azadîye de berz bikerê."

	 

	Bi jin jiyan azadî têkoşînê hemverê şîdetî

	 

	Endama Komîteya Perwerdeyî ya Meclîsê Pakrewanî yê Şîlan Kobanê, Selem Mihemed zî wina vat: "Binê felsefeya Jin jiyan Azadî de ewro ma têkoşînê xo hemverê şîdetî de danê dewamkerdiş. Hemverê 5 hezar serrî tarîxê koletîya cinî de ganî ma bibê yew. Roja ma ya ewro de wexto ke cinî zanaye bo ancî zî do şîdetî dir rî bi rî bo la ganî cinî hemveeê nê de fek têkoşînê xo ra vera nêdo."

	 

	'Ganî cinî xo birêxistin bikero'

	 

	Selem Mihemed tewr peyîn wina vat: "Cinî milê sîyasî, leşkerî, ekonomî û komelî de şîdetî dir rî bi rî manenê, coka cinî roja ma ya ewro de xo her wareyî de bi rêxistin bikerê û bidê îsbatkerdiş. Eynî wextî de zanayîşê xo zêde bikero û do no peynîya şîdetî bîyaro.”