Polîsan destûr nêda ke keyeyê Nûra Kurte şîn rono 

2024-12-11 15:26:44


	 

	 

	RIHA - Nûra Kurta 65 serrî ke Almanya de dinyaya xo bedelnaye, Wêranşar de hetê 5 kesan ra vernîya wecîbeyê dînî, bi ablûqakerdişê leşkeran, ameye definkerdiş û polîsan destûr nêda keye şîn rono.

	 

	Nûra Kurt (65) ke 4ê Kanûne de semedê nêweşîya gurçikanê xo, semedê dermankerdişî Mexmûr ra şîbî Almanya, dinyaya xo bedelnaye.

	Nûra Kurt Taxa Herwanî ya qezaya Wêranşarî ya Rihayî binê ablûqakerdişê leşkeran de ameye definkerdiş. Nura Kurt ke serê sibayî cenazeya aye resa Amed, badê ardî Wêranşar. Wexto ke cenaze ardî, leşkeran teda keyeyî rê kerd ke lezkî cenaze bêro definkerdiş. Meydanê goristanî ke hetê bi seyan leşkeran ra ame ablûqakerdiş, bi dronê keşfî ame qeydkerdiş.

	 

	Polîsan destûr nêda ke şîn semedê Nura Kurt qezaya Wêranşarî ya Rihayî de bêro ronayîş. Keyeyê ke badê definkerdişî binê ablûqa de şîyî keyeyê şînî, hetê polîsan ra ameyî astengkerdiş. Polîsan keyeyê şînî ablûqa kerd û keyeyî ra vatî ke destûr nîno dayîş şîn ronê. Polîsan teda keyeyî kerd û tehdîd kerd ke ê do nêverdê kes şêro şîn.

	 

	Nûra Kurt kam a?

	 

	Nûra Kurt, serra 2007ine de pêwa di kênayanê xo tewrê mîyanê refê PKKyî bîyî. Nura Kurta ke 2 serrî badê semedê problemê weşîye Mexmûr de ca bî û serra 2014ine de semedê dermankerdişî şîye Almanya. Nura Kurta ke 10 serrî bi teşhîsê nebesiyê gurçike ameyîne dermankerdiş, 4ê kanûne de dinyaya xo bedelnaye.