Rewşa weşîye ya Werîşe Muradî xirab a

2024-12-14 14:30:57


	 

	 

	MERKEZÊ XEBERAN - Rewşa weşîye ya tepişteya sîyasî ya kurde Werîşe Muradî ke zîndanê Evîne de ya, xirab a. Ame vatiş ke Werîşe Muradî xizmetê weşîye ra bêpar ameya verdayîş.

	 

	Ajansa HRNAyî xeberêke xo de bale ant rewşa tepişteya sîyasî ya kurde Werîşe Muradî ya zîndanê Evîne ser o. Xebere de ame dîyarkerdiş ke rewşa weşîye ya Werîşe Muradî ya zîndanê Evîne de xirab a û xizmetê weşîye pêşkêşê Werîşe Muradî nêkenê.

	 

	Tepişteya sîyasî ya kurde Werîşe Mûradî 10ê teşrîna verêne de hemverê caardişê cezaya dardekerdişî yê hetê rejîmê Îranî ra yeno kerdiş, dest bi grevê vêşanîye kerdebî. Badê cû zî tedayê rêxistinê komelê sivîl, mîyannetewî, çalakîker û azadîwazan de, vengdayîşê Komeleya Cinîyanê Azadan ê Rojhelatê Kurdistanî (KJAR) yê 25ê teşrîna peyêne ser de, peynîya çalakîya xo ya grevê vêşanîye arde bî.

	 

	Ercê vîrardişî yo ke tepişteya sîyasî ya kurde Werîşe Mûradî 1ê Tebaxa 2023ine de nêzdîyê Sine hetê pasdarê rejîmê Îranî ra ameye destbendkerdiş. Badê cipersayîşê 5 aşman yê merkezê Îtlaetê (Îstixbaratê Îranî) berdîya zîndanê Evîne yê Tehranî.