‘Şirawitişê pereyan ke sey sûc ame vînayîş, girêdayeyê tecrîdî yo’ 

2024-12-19 09:10:04


	 

	Nazlican Nûjîn Yildiz

	 

	ÎZMÎR - Hemsereka EGE-TUHAYDERî Ayfer Yildirim derheqê kampanyaya semedê paştdayîşê keyeyê tepişteyan ke înan rê pere şirawitî û sûcdar ameyî vînayîş de qisey kerd û vat; şirawitişê pereyî yê semedê tepişteyan sûc nîyo û sûchesibnayîşê şirawitişê pereyan, girêdayeyê tecrîdî yo.

	 

	Binpaykerdişê heqanê zîndanan ê Tirkîya û Kurdistanî, roj bi roje zêde benê. Pêwa ke Rayberê PKKyî Abdullah Ocalanî dir pêvînayîş ame kerdiş zî seke Rayberê PKKyî Abdullah Ocalanî vat, tecrîd hema zî dewam keno. Hatîce Yildiza 75 serrî ke semedê sebebê kênaya xo û hevalanê kênaya xo rê pere şirawitebî, 4 serrî û 2 aşmî cezaya zîndanî aye rê amebî birnayîş, 23ê Adare de tepişyabî. Endama Komeleya Heqanê Merdiman (ÎHD) Şubeyê Stenbolî Hatîce Onaran zî bi îdiayê "Hemverê Qanûnê Vernîgirewtişê Fînansekerdişê Terorî" 4 serrî û 2 aşmî cezaya zîndanî dîya û ameye tepiştiş.

	 

	Hemverê nê de xeylêk bajaran de kampanya ameye destpêkerdiş. Îzmîr de 16ê kanûne de zî kampanya ameye destpêkerdiş. Hemsereka Komeleya Paştdayîşî û Hetkarê Keyeyê Tepişteyan (EGE-TUHAYDER) Ayfer Yildirim qisey kerd û vat, nê caardişî girêdayeyê tecrîdî yê û bi amancê paştdayîşê tepişteyan na kampanya dîyaya destpêkerdiş.

	 

	Şirawitişê pereyan binê kontrolê dewlete de yo

	 

	Ayfer Yildirim da zanayîş ke sûchesibnayîşê şirawitişê pereyan, caardişêk kêyfî yo û trajîkomîk o. Ayfer Yildirim wina vat: “Şirawitişê pereyan binê kontrolê dewlete de yo. Wexto ke keyeyî pere şirawenê, raştî de şirawenê sazgehê dewlete. No pere binê kontrolê wezîfedaranê zîndanî de yo. Vanê ke bi amancê fînansekerdişê terorî yeno kerdiş. O wext ê zî terorî dir fînanse kenê?”

	 

	‘Cuya tepişteyan yena xespkerdiş’

	 

	Ayfer Yildirim wina dewam kerd: “Teber ra werd, cil û belg û dermanan nêgînê zere. Tepişteyî lazimî kantîn ra peyda kenê. Nê zî bi pereyê ke yenê şirawitiş kenê. Nê sûcdarkerdişî dir heqê tepişteyan bi zanebîyayîş yeno xespkerdiş. Nê caardişî girêdayeyê tecrîdî yê. Tecrîdo ke Abdullah Ocalanî ser o, pêro komelî rê yeno kerdiş. Tepişteyan ser o zî yeno kerdiş. Coka nê caardişî girêdayeyê tecrîdî yê.”

	 

	‘Ganî komel hîsgêr têbigêro’

	 

	Ayfer Yildirim tewr peyîn wina vat: “Heta nê binpaykerdişî werte ra nêrê wedaritiş, do kampanya û xebatê ma yê bînî zî dewam bikerê. Ganî komel na babete de hîsgêr bibo. Na babete, babeta heqê merdiman a. Ganî her kes nê çî baş bizano û goreyê nê hîsgêrî ramojno.”