‘Azadîya Abdullah Ocalanî û aştîyêke bi rûmet wazenê’

2025-02-27 11:00:34


	 

	   

	 

	ÎZMÎR - Cinîyan bale ant muhîmîyê eşkerayîya Raberê PKK'yî Abdullah Ocalan ser û vatî ke waştişê înan ê sereyîn azadîya Abdullah Ocalanî ya.

	 

	Tecrîdo girankerde yê Rayberê PKK'yî Abdullah Ocalanî ser o Zîndanê Asayîşê Berzî yê Tîpê Fyê Îmraliyî de yeno tepiştiş, dewam keno. Heyetê Îmraliyî yê Partîya Têduştî û Demokrasî (DEM Partî) do ewro Zîndanê Tîpê Fyê Asayîşê Berzî yê Îmraliyî de Rayberê PKK’yî Abdullah Ocalanî dir pêvînayîşê hîrêne organîze bikero. Heyet badê pêvînayîşî do Stenbol de saete 17.00ine de eşkerayîye bido.

	 

	Do Amed de zî Meydanê Şêx Seîdî de ekranê pîlî de eşkerayîye gane bêro dayîş. Yeno pawitiş ke do bajarê derûdorî ra xeylêk kesî bêrê Amed, Wan de zî do ekranê pîlî Meydanê Bajarî de bêrê ronayîş. Yeno pawitiş ke bi hezaran kesî bajarê Serhedî ra bêrê Wan. 

	 

	Cinîyê Îzmîrî bale antî rewşe ser û fikrê xo ajansê ma JINNEWS'î rê ardî ziwan. 

	 

	'Azadî Abdullah Ocalanî rê, aştîyêke bi rûmet'

	 

	Dayîka Aştîye Nufusa Ataç, qiseykerdişê xo de wina bale ant serê averşîyayîşî: "Şarê kurdî tena nê di aşmê peyîn de nê, zêdeyê 40 serrî yo mîyanê waştişê aştîye ya bi rûmetî de yê. Ma nêwazenê gonîya tu kesî bêro rijnayîş. Vatî; ma do Abdullah Ocalanî azad bikerê û aştî pê bîyarê. La qeyûm tayînê şaredarîyanê ma kerdî, her roje Rojawan bomba kenê, tut û kalan qetil kenê. No waştişê aştîye senîn o? Xeylê ekonomîya welatî semedê şerî yena xerckerdiş û eke aştîye pê nêro, do tengîyê ekonomî hîna zêdeyêr bibo. Na aşma Remezanî de kesê wayîrê wijdan, demokrasî û huqûqî, do aştîya bi rûmet qetî bikerê."

	 

	'Ma azadîye wazenê '

	 

	Hasîbe Akdogan, dîyar kerd ke şarê kurdî her tim mîyanê zulm û zextan de bî û wina vat: "Tirkîya êdî polîtîkayê ke feyde do bidê şarî awan nêkena. Sey Selahattîn Demîrtaş bi hezaran sîyasetmedarî nika tepişte yê. Oyo tewr muhîm zî rayberê ma esîr ameyo girewtiş. Îradeyê ma Rayber Abdullah Ocalan o. Ma sere de semedê rayberê xo û semedê pêro tepişteyanê xo azadî wazenê. Semedê merdimayî hêvîyêk a û ma wazenê ey teber de bivînê. "

	 

	'Ma aştîyêke bi rûmet wazenê'

	 

	Naîme Kocakaya endama DEM Partîye wina vat: "Dewa ma ameye veşnayîş û ma koçber bî. Edî ma nêwazenê şarê kurdî zulm bivîno. Azadî do tena bi xêrê Abdullah Ocalanî pê bêro. Eke Abdullah Ocalan nêbîne bîyayîşê kurdan hende nêameyîne naskerdiş. Ma hemverê qetlîyaman ê. Ma aştîyêke bi rûmet wazenê. Sewbîna ma azadîya Abdullah Ocalanî wazenê. Sewbîna aştî pê nîna."

	 

	'Azadî heqê eyî ya'

	 

	Gugerçin Şakal, da zanayîş ke nika zîndanan de xeylêk kurdî est ê û ganî êdî tepişteyî biresê azadîya xo û wina vat: "Ma aştîyêke bi rûmet wazenê. Ganî Rayberê Şarê Kurdî Abdullah Ocalan zîndan ra vejîyo. Azadî heqê eyî ya tewr bingehîn a.”