
10 serrî yo Gever de huqûq bica nîno 

2025-03-11 10:48:47


	&nbsp;

	Derya Ren&nbsp;

	&nbsp;

	COLEMERG - Hemsereka ÎHD'yî ya Colemêrgî Sîbel Çapraz, dîyar kerd ke badê îlankerdişê îdareyê xoserî xeylêk binpaykerdişê heqan pê ameyî û huqûq ame îhlalkerdiş. Dîyar Akino 15 serre o wext ame kiştiş û dayîka ey Maksîme Akin zî wina vat: "Lajê mi semedo ke derman bigîro şi la ame qetilkerdiş.”

	&nbsp;

	Geverê Colemêrgî de 13ê Adara 2015ine de Îdareyê Xoserî ame îlankerdiş, dima ra dewlete zî 5 rey qerarê qedexeyê teberî îlan kerd. Qdexeyan de xeylêk heqê merdiman ame îhlalkerdiş û 90 kesî netîceya hêrişan de ameyî kiştiş.&nbsp;

	&nbsp;

	Dîyar Akino 15 serre, semedê babîyê xo yê nêweşî rê derman bigîro vejîya teber û o wext polîsan bi gazê îsotî hêriş berd ser. Dîyar Akin semedo ke xo bipawo vejîya serê banê keyeyî, la guleyê panzere ame eştiş û ame kiştiş. Cigêrayîşê keyeyî yê hetê huqûqî de tim dewam kerd, la heta nika nêresa tu netîce. Semedo ke kerdox nêame zanayîş, dewa ameye padayîş.

	&nbsp;

	Hemsereka Komeleya Heqê Merdiman (ÎHD) ê Colemêrgî Sîbel Çapraz, o wext endama Meclîsê Pêroyî ya Bajarî ya Colemêrgî ya Partîya Herêmê Demokratîke (DBP) bî. Sîbel Çapraz çalakîya veng vetişî de bî hedefê polîsan û bi guleyan birîndar bî. 96 rojan nêweşxane de mende û 14 amelîyat derbaz kerd. Dima ra zî bi sebebê "Endamîya Rêxistine" ameye tepiştiş. Badê serrêke serbest ameye veradayîş.&nbsp;

	&nbsp;

	Sîbel Çapraz, dîyar kerd ke demê qedexeyan de xeylêk heqê merdiman ame îhlalkerdiş û wina vat: &nbsp;"Nê prosesî de xeylêk heqê cinîyan ame binpaykerdiş. Îlankerdişê qedexeyê teberî yê 79 rojî yeno manaya binpaykerdişê huqûqî. Badê qedexe peynî bî, dêsan ser o nuşteyê nijadperestî û cinsperestî ameyî nuştiş. Nê nuşteyî medyaya dîjîtale de ameyî parekerdiş.”

	&nbsp;

	Sîbel Çapraz, dewam de wina vat: "Goreyê raporê ÎHD'yî, 78 cenaze Sazgehê Tibê Edlî yê Erziromî de bî. Qeza de koçberî zêde bî, yê ke mendî zî şîn girêdayî. Rêçê zaf kûr pey xo de verda. Welatîjan merdimanê xo vînî kerd, vîrardişanê xo vînî kerd. Şîno ke ame ronayîş tîya tu wext nêqedêno. Badê nê prosesî herême de qedexe ame destpêkerdiş. Zozanî dewijan rê ameyî qedexekerdiş. Taxê qeza de kalekolî ameyî awankerdiş û qeza açarya herêma leşkerî. Serra 2016ine de herême de çalakî ameyî qedexekerdiş."&nbsp;

	&nbsp;

	Dayîka Dîyar Akin Mehsîma Akin zî ajansê ma rê qisey kerd û vat: "Her tim polîsî erzenê keyeyê ma ser. Wexto ke polîs yenê ez fotografê lajê xo arêdana û niminena. Wexto ke ez ewnîyena fotografê lajê xo ra boya mi vejêna la no zî ma rê qedexe yo. Dîyar, semedê babîyê xo nêweş ke nêweşê dîyabetî bi, derman girewtêne la ame kiştiş. Ma ra vatî birîndar bîyo la ma nêzana ça de yo. Wexto ke mi xo resna nêweşxane, mi zana ke lajê mi dinyaya xo bedelnayo. Lajê mi hema tut bi, merg para ey nêbî..."&nbsp;

	&nbsp;

	Mehsîma Akin, tewr peyîn wina vat: "Mi dewaya ke ameye vînayîş de înan ra vat; lajê mi tut bî, destê şima senî şi? Şima senî qetil kerd? Înan mi ra vat, ‘Ma xeylêk tutan kişt’. Badê nê vatişî mi zana ke ma hetê huqûqî de nêresenê tu cayêk.”

	&nbsp;

	&nbsp;