'Tecrîd dewam keno' 2025-03-14 09:06:50   Nazlican Nujîn Yildiz   ÎZMÎR - Hemsereka EGE-TUHAYDER’î Ayfer Yidirim da zanayîş ke badê vengdayîşê seserre semedê proses bêro dewamkerdiş, ganî azadîya fîzîkî ya Rayberê Şarê Kurdî Abdullah Ocalanî pê bêro û da zanayîş ke vengdayîş zaf muhîm o, ganî dewlete gaman bierzo.   Vengdayîşê ‘Aştî û komelê demokratîkî’ yê Rayberê Şarê Kurdî Abdullah Ocalanî ke 27ê sibate de ame deklerekerdiş, hema veng dano. Badê vengdayîşê seserre bi taybetî şarê kurdî û pêro şaran waştişê azadîya fîzîkî ya Abdullah Ocalanî kerdî. Şarê kurdî dîyar kerd ke semedê proses baş bêro kerdiş, ganî şert û mercê azadîya Abdullah Ocalanî pê bêro û ganî heqê hêvîye hetê Tirkîya bi baldarî bêro girewtiş. Pêwa nê azadîya tepişteyanê sîyasî û nêweşan zî rojeve de yo.   Hemsereka Komeleya Paştdayîşî û Hetkarîya Keyeyê Tepişteyan ê Egeyî (EGE TUHAYDER) Ayfer Yildirim, da zanayîş ke azadîya fîzîkî ya Rayberê Şarê Kurdî Abdullah Ocalanî xeylêk muhîm a û ganî dewlete semedê vengdayîşê seserre gamê samîmî bierzo. Ayfer Yildirim dîyar kerd ke tecrîd û zextê zîndanan dewam keno.   ‘Birêz Ocalan çîyo kewt milê ey ser kerd’   Ayfer Yildirim dewam de wina vat: “Pêwa Birêz Abdullah Ocalanî, bi hezaran hevalê ma yê tepişteyî zere de yê. Vengdayîş, vengdayîşêk zaf muhîm o. Nika birêz Abdullah Ocalanî wezîfeyê pê ardo. Bi hawayêk eşkera paştdayîşo tewr pîl da aştîye. Bi rastî zî Devlet Bahçelî yewin rey qalê heqê hêvîye kerd. Xora vengdayîş zî rehetî merdiman de awan kerd. Zere de 20 hezar kes est ê ke 4 hezarî ci ra nêweşê giran ê. Nê semedî ra qaşo cezaya îdamî ameya wedaritiş, la hevalî semedê qanûnê bînan bi zanayîş yenê verdayîş. Ma û keyeyê ê hevalan, şarê ma yo ke birêz Abdullah Ocalanî sey Rayberê Şarê Kurdî qebûl kerdê, a bawerî de yê ke semedo ke na aştî pê bêro, ganî azadîya fîzîkî ya Abdullah Ocalanî pê bêro.”   ‘Ganî Abdullah Ocalan teber de bo’   Ayfer Yildirim da zanayîş ke şar samimîyet wazeno û wina vat: “Bi serran prosesê aştîye ame rojeve la xira bî. Şar bawerîye wazeno, aştîye wazeno. Tena şarê kurdî nê, pêro şaran eleqedar keno. Semedê ma cinîyan zî xeylêk muhîm o. Şer de yê ke tewr zêde bi tesîr benê cinî yê. Semedê aştîye qetî Birêz Ocalan teber de bo. Do proses hîna zêde samîmî bo. Ma wazenê ke dewlete game bierzo.”   ‘Ganî tepişteyê nêweşî bêrê veradayîş’   Ayfer Yildirim da zanayîş ke ganî derheqê tepişteyanê sîyasîyan de game bêro eştiş û wina vat: “Tecrîd dewam keno. Pêwa nê zîndanan de teda dewam kena. Caardişê teberê merdimayî dewam kenê. Tepişteyê nêweşî rewşa înan giran a. Tepişteyê nêweşî zîndanan de xo ver danê. Nînê tahlîyekerdiş. Ganî dewlete gamanê samîmî bierzo. 20 hezar hevalê ma tepişte yê. Nînan ra 4 hezarî nêweş ê. Eke biwazê ma bi aştî bidê bawerkerdiş, ganî hevalanê ma vera bidê.”