‘Xoverdayîş semedê azadîya serekî yo’

2025-04-14 10:17:44


	 

	ÎZMÎR - Dayîka Aştîye Medîne Kaymaz dîyar kerd ke xoverdayîş semedê azadîya Abdullah Ocalanî yo û şîyayîşê Amarayî hem semedê ciwanan, hem semedê dewlete mesaj o.

	 

	Bi wesîleya 76ine Rojbîyayîşê Rayberê Şarê Kurdî Abdullah Ocalanî her cayê Tirkîya de bi hezaran welatîjî herikyayî dewa Amarayî ya Xelfetîyê Rihayî. Pêwa astengîyê polîsan welatijan hewl dayî ke biresê Amara û pêwa zextan peyser game nêeştî.

	 

	Dayîka Aştîye Medîne Kaymaz Îzmîr ra şî Riha, da zanayîş ke Abdullah Ocalan cinî bi hişmendîyê azadîye ardo têhet û va, heta azadîya fîzîkî ya Abdullah Ocalanî do her rojbîyayîşê ey de şêrê Amara.

	 

	‘Cinî resayî hişmendîyê azadîye’

	 

	Medîne Kaymaz dîyar kerd ke bîyayîşê Rayberê Şarê Kurdî Abdullah Ocalanî sere de semedê cinîyanê kurdan muhîm o û wina va: “Bi xêrê Abdullah Ocalanî cinî resayê hişmendîyê azadîye. Verê ma camêrdan ra tersayîne. Nika ma tutanê xo dir nişnenê ro, qisey kenê. Ma qalê dayiktî, cinîyan kenê. Serekî nê çî musna ma.”

	 

	‘Ez semedê tutan û ciwanan şîya Amara’

	 

	Medîne Kaymaz wina va: “Serekê ma semedê şarê kurdî her çî kerd. Ma kurdbîyayîşê xo nêzanayîne Ey semedê ma xo ver da. Ma rojbîyayîşê ey hezar rey pîroz kenê. Nika pêvînayîşî yenê kerdiş. Abdullah Ocalan semedê aştîye her tim têkoşîn kerd. La vatî û pratîkê dewlete pê nêgînê. Rojnamegerî yenê tepiştiş, qeyûmî yenê tayînkerdiş. Bi fekê xo vanê aştî la çîyêk nêkenê. Aştî bi zextan nê, bi azadî mumkin a. Azadîya Abdullah Ocalanî zî bi xoverdayîşê şarî mumkin a. Ganî azadîya fîzîkî ya Abdullah Ocalanî pê bêro. Kurdî xo ver bidê do Abdullah Ocalan azad bibo.”

	 

	‘Ez o her tim şêrî Amara’

	 

	Medîne Kaymaz wina va: “Ez 80 serrî ya. Çi destê mi ra bêro ez o bikerî. Ez o şêrî Amara. Ma heqdar ê. Ma do aştî bîyarê. Kes nêeşkeno ma rayîrê ma ra bikero. Ma do heta peynî xo ver bidê. Ez o her serre şêrî Amara û do no xoverdayîş dewam bikero.”